Apeisa kum ni sunga Israel leh Hamas kikal a gal jieh in Israel leh Vatican Khuopi kikal ah zong kilungnopmawna tampi um. Tutan in Palestinete mi 64,000 nai ashita a, atamzaw numei leh naupangte ma ahi. Vatican in Israelte’n agalte uh atha dan uh pen, ganhing tha a atha uh ahi chi’n Cardinal Parolin in aphuonga, tam pen Israel kumpite’n azada uhi. Kouma leh kouma kihung kahi bou ua, koima ganta tha in ka that khasih uhi chi’n akilep uhi. Gal toh kisai vawtlou numei naupangte, amahaw leh amahaw kihung jouloute na tha lang kalsie uh, tuolthat nahi ua, itna beia na tha uh ahi chi’n Cardinal Parolin in agen a, Pu Pope Leo inzong ama thugen azop pieh hi.
Tam thu ahileh, Cardinal Parolin in Vatican a doh leh dawnlimna (interview) khat a ana gen ahia, Israelte ambassadorpa’n ana zada mama hi. Hamaste toh kilem nading ka ngaituo laitah ua, Cardinal Parolin in tambanga Israelte agensiet, thudih ahisih a, kilemna agamlasah zaw hi achi hi. Itheisa mabangun, Pu Donald Trump, US President in kilem nadingin thului 20 aluia, tamteng Hamas leh Israelte’n pha asah u’leh kilemna hing um thei va achi hi.
Cardinal Parolin in Hamaste gamtatna a-awi tuonsih a, October 7, 2023 kum a Israel mi 1200 atha uh gamtat huoisie vawt khat ahia, leitung pumpi inzong a-awi vawtsih hi achi hi. Israelte ambassadorpa’n kou zong kahi hun uh angai hi tua ahisihleh Hamaste’n Israelte agap sawm uhi achi hi. Pu Pope Leo in Cardinal Parolin thugen azop a, “Cardinal Parolin in agen ding lawm agen a, ka pompieh hi. Hamaste pan a Israelte akihun dinguh ahima hi, hitama lezong, Israelte’n mi tazapi atha uh, adieh a numei leh naupangte tamzapi ganta tha a atha uh, awi huoisih” achi hi.
Bangma chih hun in Vatican leh Israel kikal ah kithutuona ana um ngaisih a, Israel mite’n Katholik Pawlpi ana sih-et zing gige uhi. Vatican in nou Israelte Jesu na nuolte nahi uhi chi lungsim anei zinga, hichi’n Katholik Pawlpi leh Topa Jesu na nuolte kikal ah kilungnopmawna aum zing gige hi. Cardinal Parolin gennuom thupi pen ahileh, kihung un, ahivangin tutan a mi taza ganta tha a na tha uh, naki awi amah achia, Israel ambassadorpa bil ah athawl vawtsih hi.
