About Us

Zomichin Sharing Christ to Global Asia

 

Amasa pen in, Radio Veritas Asia: Zomi-Chin Vaiguol kichi hi, eimi, pau leh ham kinaiteng (Zou, Thadou-Kuki, Paite, Simte, Vaiphei leh Gangte) kikawmtuo nading leh Asia gamkai sunga Pasian Thuhoi Thupha leh mihing khantou nadinga thu leh la phuondoh thei nadinga  kiguong radio vaiguol ahi. Vaiguol min ‘Zomi-Chin’ ichi uh pen, 1994 kum a Fr.Mark Thang Khan Ai leh Fr.John Omse in Manila, Philippines Gam a May ha, 1994 a ana phuo gel ahi. Radio ngai phasa khat in ‘Eimi Service,’ ahisihleh ‘Zomi Service’ chilei ngai jawva achi ua, amahaw ngaidan Radio Veritas Asia Headquarters (RVA Innpi) ah ka tut ua, ahi’n tuana vaisaite’n Zomi-Chin Service chia na phuosa uh ahi chiengin khelda mai un ajieh pen, ei panpite (donors) in tami min a eina theisa uh ahijieh in hichi den maileh hoi jaw chi’n ei dawng uhi. Min ngai pen hisih lezong, tu-le-tu a dingin tami min peipi tadi mai vai.

Tami radio vaiguol ahing kipat dan sut lei, hamphatna tangthu khat ahi. Philippines Gam ah June ha 1993 kum in Fr.Mark Thang Khan Ai in Hindi Service saipa, Fr.John Sulya, East Asian Pastoral Institute ah ava kimupi kha a, Fr.John in Fr.Mark kungah, ‘Nouma ham in radio vaiguol khat kinget lachin ahing kikhia sih ding hi’ achi hi. Fr.Mark Thang Khan Ai in tualai tah vaisaipi (manager) Erlinda So, Fr.John Omse toh ava kimupi ua, ngetna lai khat asep gel hi. Erlinda So in, ‘Zomi-Chin kichite koi e, heia tenguh ahi uoi tualeh mi bangza apha uoi, tualeh radio nasem thei mi aum diei’ chiin ana dong dendon hi. Amanu thei nuom dungzui in Fr.Mark in India a akile jou in suichienna (research) neunou khat abawl a, athei khomteng Erlinda So kungah ahahsuh pai hi. Lai toh kikawmna jousie Fr.Mark in abawl a, Fr.John Omse akinuakum nawn sih hi.

 Nipi kal khat a nivei suoh dingin Zomi-Chin Service vaiguol masa, August ha nimit 06, 1996, nitah Nai 9.00 PM ah ahing suoh hi.  Nipi jaw Ni khat ni (Monday) leh Nipi jaw ni nini (Tuesday) nia suoh dingin aguong uhi. July ha, 1998 kum in kal khat ah livei vaiguol ahing suohta hi.  Kum 2000, August ha in Fr.Mark Thang Khan Ai RVA Innpi a kikupna lienpi khat ah ava pangta a, tami vaiguol nisim vaiguol (daily service)  in ei siempiehta un chi’n ava thuumta hi. Hamphatna lienpi toh July ha nimit 17, 2003 kum in Zomi-Chin Vaiguol khu nisim vaiguol ahing suohta hi. Radio ngaite pan in kum khat ah deisahna lai 4000 val akimu hi.

Kum 2014 January ha in Zomi-Chin Service akihawmkhie a, Kalay Diocese a dingin nithum akikhen piehta hi. Tu’n Zomi-Chin Service in ni li atanga, tua ban ah ni khat sunga nai 24 a kiviel (streaming) kumlui 2015, July ha in akipanta hi. September ha angai mi 1500 bang apha a, ahing kibelap nalai ding ahi. Kipah huoi mama. 

 

Tami Vaiguol na tungdohte

Ms. Erlinda So
Ms.Erlinda So in tami vaiguol tundoh nadingin 1994 kum in kot ana hong masa hi. Kum ni sungin tup leh ngimte ahing tangtunga, August ha nimit 06, 1996 in vai masa, minute 27 a sau  ahing kihahta panta hi. Ms.Erlinda So tungah lungdamna lienpi tungta hen.

Fr. John Sulya, SVD
April ha, 1994 kum in Fr.John Sulya, Hindi Service a lutangpa leh Fr.Mark Thang Khan Ai, East Asian Pastoral Institute ah ana kimutuo kha ua, ama’n Fr.Mark kungah ‘RVA in ham tuomtuom asui laitah ahijieh in nouma ham ah vaiguol khat kinget in’ chi’n ana hanthawn hi. Ama kungah zong lungdamna lienpi tungta hen.

Lynlin Bautista
Amanu pen ‘Zomi-Chin Service nu’ chithei ahi, ajieh pen, tami service kipat a pat ama’n ana ettup ahia, ama panpina toh tami service ahing piching pan ahibou hi.

Richy Matamis
Lynlin Bautista in anasep angah jou Richy Matamis in ama panmun aluo a, ama’n zong kisapna chintengah panmun aluo a, vaiguol jousie ana suttuo a, chinlana nengnengah theisahna leh hilchienna ei pie gige a, ama kungah zong lungdamna lienpi iphuong uhi.

Fr. Gabriel Htun Myint
Tu leh tu a vaiguol jousie sai a pang ahia, ama ei panpi jieh in, tami vaiinn ah bangma jousie aki sutup thei pan hi. Ei kihuna sum leh paite ahing kiemsuh chiengin ama’n ei panpite kungah ei nget pieh sawnsawn a, sum leh pai ahing khangsah kia a, ama kungah zong lungdamna lienpi ithuh uhi.

Archbishop Joseph Mittathany, D.D, Archbishop Emeritus of the Archdiocese of Imphal, India
Philippines Gam pan ahing kile jou in, Fr.Mark Thang Khan Ai in Archbishop Joseph Mittathany kungah alungtup leh vai khat ahing tut khu ama kungah agen pai a, Pu Archbishop Joseph inzong ana sanpieh pai hi. Pastoral Audiovisual Centre pansia a nasep nading mun ei guon pai a, tu tantan tami vaiinn ah RVA Zomi-Chin Service abusa nalai hi. Kumsawt hingta hen Pu Archbishop Joseph Mittathany.

Mr. Lawrence Suonmeng
Sia Lawrence Suonmeng ahileh, tami vaiinn a pang dinga naki koi masa pen ahi. Tua masangin, lasa vahle, volleyball benga a vahleh, ngahnu tamtah mitdim nadinga vahleh tangval melhoi mama khat ahia, ahi’n Fr.Mark Thang Khan Ai in aseppi dingin ana manta hi. Tutantan in asem nalai a, vaiguol chieng (programme editor) in apang hi. Lasa minthang khat zong ahia, labawng (music album) tamtah ah ama lasahna zong atel hi. Fr.Mark toh Zomi-Chin Vaiguol ana phuttonpa chilei chikhiel sih vai.

Archbishop Dominic Lumon, D.D, Archbishop of Imphal
Pu Archbishop Dominic Lumon in Archbishop Joseph tanga ahing pan jou in, amasangapa ma bangin RVA:Zomi-Chin Service atawsawn pai ngal a, ahun hun in vaiinn ah ahing lut zel a, hanthawnna thu atut jel hi. Diocese a pawlpi mi jousie’n aphatttuompi lou pen dahuoi asa hi ajieh pen, ei Zomi-Chinte maimai a dinga  kiguong vaiguol ahibou hi. Tualai in Kawl Gam a Hakha Diocese a eimi kampaute toh kithuo in vai ana kiguong jel hi.