Suhlam Philippines Diocese of Imus a Cavite province huop sunga parish, school leh Catholic institution te kungah tarpaulin, plastic vanzah tuom tuomte zanglou ding leh amuot theilou vante zanglou a buathah kiemsah dingin ngetna anei hi.
October 14 a lai kithena ah Bishop Reynaldo Evangelista in diocese in “Zero-Waste Church” ahi theihna dinga campaign ah pan nasatah in ala hi chi’n CBCP News in a tahlang hi.
Tami laithe in puon banner te zah a tarpaulin zahlou dingthu agen a, Pawlpi kipawl khawmna tuom tuomte kungah plastic vanzah ann tuunna, nehthei tuunnate leh innzepna plastic vanzah tuom tuomte zanglou dingin angen hi.
“Local Church of Cavite a plastic buathah kiemsah nading lampi izawtna un aga lientah a ang suon thei nadingin pan lakhawm chiet vai,” chi’n Bishop Evangelista in agen hi.
Tami panlahna hi Pope Francis laigiel Laudato Si’ pan a kihantawhna tha ahi a, tami laibu in khuo leh hui kepbit ding imopuohna uh ahi dante agen hi adieh in migentheite leh khang sawnte ading in kepbit dinga apoimaw dan.
“Ecological conversion hi diocesan program mai hilou in ihindan uleh i silbawlte uh kikhelna ahi a, tuachi’n midangte dinga buathah bang maia kilang khu eite’n mopuohna toh ipanlah nate un midangte hinkhuo ahing kikhelsah a hinkhuo tha neithei nading ahi,” chi’n Bishop Evangelista in gen.
