Gaza a buoina hi 1945 kum laia Nagasaki khuopi kisuhsiet lai toh tekah thei ahi chi’n Bishop William Hanna Shomali, Patriarchal Vicar for Jerusalem and Palestine in agen hi.
“Tuami gam a um mite dingin hun tawp nit oh akibang ding hi,” chi’n Bishop Shomali Radio Veritas Asia toh doh leh dawnlimna anei in agen hi. “Hun sawt pei nailou in Nagasaki a bomb aki khietna kum 80 achinna imelchi ua tuanah mi 74,000 vel in shina ana tuoh uhi. Tun Gaza jong bangma dang ahi dieh sih hi mi tampi’n shina atuoh ta a, tualeh ahun ang sawt jieh in jong mi agenthei deudeu a tualeh khuo leh tui nasan in athuoh genthei hi.”
October 7, 2023 akipat in tami gaal in mihing hinkhuo 60,000 vel ala ta a, tuate lah ah numei leh naupangte hinkhuo jong ahi. Tuaban ah neh leh tah kisuhlou jieh a mi tampi agenthei hi adieh in naupangte. Sanginn te jong aki khah kalsie kum 2 achingta a amaban ua khangsawnte adingin amailam hun uh amiel mama hi. Zatou inn jong akisuh nonsih a zatui zaha jong hoitah in amu sih uhi tualeh mei leh meitui jong amu sih uhi. Giehna tenna kisuhlou jieh in buh alam ua tuana abusa uhi. Hichidan in anisim hinkhuo uh genthei tah in amang uhi.
“Tami hun laitah in pawlpi in abawlthei teng abawl a, hagau lam leh tahsa lam panpinate pieh thei dandan in akipie hi. Tualeh thumna ah jong akithum pieh zing hi. Neh leh tah tualeh zatui zaha te akihawm a tualeh a hagau hinkuo lam uah jong aki pui uhi himananleh kou bawlthei na maimai in achin sih hi,” chi’n Bishop Shomali in RVA kungah agen hi
“Tam hun hamsa ituoh laitah un kinepna toh pang zing vai. Pasian in ithumna te uh ei san pieh nava uh chi ikinem uhi,” achi hi.
Translated by: William Zo
