Churachanpur Forest Division te’n St. Mary’s School , Tuibuang ah khuo leh hui toh kisai Eassy competition sai

Tulai leitung pumpi khuo-le-hui ten sietlam natah tung sah ah, gam votna ding gam nisah, satna ding gam a vot, guo jutlou na ding ah ju, tualeh kumdang a um ngailou gam tampi ah tuilet chi tam mama tah hi. Tua jousie khu ei mihingte bawl leh gamtatna jieh ahia, tuate kem vai chileh eima khut ah ki nga ahi.

Khuo-le-hui sie mama tah ahi jiehin Leitunga Catholic pawlpite’n jong Khuo-le-hui kem siemna dingin Phamsa Pu Pope Francis in ‘Laudato Si’ chi na phut in, leitunga pawlpi mite, Sang inn te lah natah in tam ‘Laudato Si’ ki peipi laitah leh natah a ki bawl laitah ahi.

Manipur Diocese injong nasatah in peipi ah khuo-le-hui toh kisai in Pu Arcbishop Linus Neli leh Rev. Fr. Verghese Velickakam tegel mawpuona toh Manipur sung mun tuamtuam , sang inn tuamtuam ah khuo-le-hui toh kisai thu-le-laa genna, awarness, Seminar, Singnou suan chi leh Dangdang tampi sai koikoi uhi. Tamte jousie saina dinga sum-le-pai khu Manos Unidas Spain pa’n neu khat sponsor ahi.

Khuo-le-hui toh kisai in apeisa 27 September ni’n Churachanpur Forest Division leh St. Mary’s School te ki thua khawm in Eassy competition sai ua, tuana thupi’n “Human-Animal Co-existence’’ na zang uhi.

Program ah Pu Lunkhomang Haokip, Range Officer, Churachanpur in thugen ah competition kisaina jieh leh tup leh dawite genna nei ah, tuabana Sr. Lucia, Principal of St. Mary’s School in vaidawn thugenna nei ah, tuana sangnaupang competition ah pangte’n khuo-le-hui toh kisai thute, laate hoitah jui siem dingin hanthawn hi.

Tualeh Nianthianhoi DFO Churachanpur in thugenna ah, gamsate, tungleng vate kep siem dingdan leh thupi dante gen ah, mihing leh gantate hinkhawm pawimaw dan jong gen in, tamtoh competition ki pan ngal ah. Competition sunga School 13 tel a, tuasunga naupang 128 Eassy competition kidemna ah atel hi.