‘Kikhelna, Kikhelna, Kikhelna’: Cardinal Ignatius Suharyo Asia gam a pawlpite kungah tangkou

“Kikhelna, Kikhelna, Kikhelna.”

Tami thuteng thumte’n Jakarta Archbishop Cardinal Ignatius Suharyo thugen poimaw tah khu apuo hi, Federation of Asian Bishops’ Conferences (FABC) a 12 veina Plenary Assembly a genkhawmnate a ngaihtuo lai in, Pawlpi synodal zinna lampi khu structure kikhel danglamna bangma a um masang lungtang kikhel danglamna apan a kipan ahi, achi hi.

July 24 a Hotel Mulia a Leatris Media Room a assembly press conference aniveina neina ah national leh international media-te ahoupina ah Cardinal Suharyo in kal khat sung kikhawpna khu ginna khat ah ahing kinuale zel hi chi agen a, tuami siem thana dih tah khu mimal leh khotang hindan kikhelna pan a kipan ahi, achi hi.

Cardinal Suharyo in, "Tami Plenary Assembly a 12 veina thupi khu synodal conversion ahi," achi hi. "I unaute, strategic position a dingte dingin synodal conversion zang dinga chielna jong ahi."

"Iki mukhawmna un politics toh kizawpna a neisih hi," achi hi. "Moral calling tungtang igen uh ahi."

Politics lama dawnna pelou in Pawlpi in puitu hina leh zapi mopuohna kipete alungsim/ngaituonate khahlou sah ding asawm ahi chi’n agen chien hi.

Amasa pen khu mihing chinte za-umna zana ahi.

Asia gam mun tam tah ah mihing za-umna/khat leh khat kizatatna khu hoitah a ki peipi khawl lou in agen hi. Tuajiehin, kikhelna dih tah umna dingin mi chin khu khotang, sum leh pai, leh politics hinkhuo laigil pen a koi angai hi.

Sil ngai poimaw anina khu zapi adinga phattuomna, adieh in mi a million a sim in gentheina athuoh na gamkai ah.

Cardinal Suharyo in mi hausa leh genthei te kikal a kikhietna lien semsem khu Asia gam a hasatna lien pen khat ahinalai thu agen a, margin a umte toh kipumkhatna tha nei ding zong chielna anei hi.

Environment responsibility khu thupi dang hing kilang khat ahi.

Cardinal Suharyo in ecological suhsietna khu mihing du-amna toh ate a, khotang genthei pen pente’n khuo leh hui sietna nasa pen athuoh uhi chi amudoh hi. Silsiem ngaisah khu mihing za-umna kep bitna leh zapi adinga phattuomna masawnna toh akikhen theilou thu agen kia hi.

Cardinal Suharyo in, "Indonesia mi ka hi nabang leh Pawlpi mi kahi nabangin, tami hi mi jousie dinga chielna ahi chi ka thei hi," achi hi.

FABC Plenary Assembly in synodality tungtanga a theisiemna a peipi zel lai in, Cardinal Ignatius Suharyo ngetna baisam tah, himaleh apoimaw pen in a thugen chien penkhat apie a: Pawlpi malam hun—leh khotang hinkhuo—khu programme tha ama, policy tha ama khat ah akinga masa sih a, kikhelna lampi zuinuomte lungtang ah akinga ahi