Indonesia Minister in Asia gambup a Ginna Lamkaite kung a ‘Itna Kamteng’ a gending in phutna anei hi.
Indonesia a Sakhuo Tungtang a Minister, Nasaruddin Umar, in Asia gambup a pawlpi tuomtuom ten “ Itna Kamteng” khu pawm ding leh buaina suhveng na ding a lampi leh lemna hatzawsem na ding, kikhentelna umlou a ginna tungtawn a kipumkhatna ding chin agen hi.
12th Plenary Assembly of the Federation of Asian Bishops’ Conference ( FABC ) lopna a Hotel Mulia Jakarta July 21 a athugenna a, Umar in kikhopkhawm na khu Catholic Hattuom sunga thu kikup khawmna toh athupi zawsem hi chin agen hi. Aman agenzel na a lemna umna ding a innsung mite kipumpiah ding, kipumkhatna hatsah semding, mailam hun a Asia gambup khantouna ding a dihtatna toh nasep ding ahi chiin agen hi.
Tami kal suonkhawmna pen lemna hing tunna ding, mipite lah a kipumkhatna hatsem nading ahia, tualeh mailam hun a Asia gam gambup a lemna leh dihtatna hing tun semna ding ahi chin aman Cardinalte, bishopte, siempute tangval siengthoute leh mipi palaite hing peikhawmte kunga vaidawnnan thu agen hi.
Asia gambup sung a pu-le-pa tawndan, ham le pau, leh sakhuo a kidaidanna alian mahmah hi. Tuami mai hilou in gambup tuomtuom a kidemna, sepai thahat a kibuaina, khotang kikhentelna, sakhuo kipawm theilouna, kikimlouna, lum-le-vot kihengna, pem kawikawina, leh bawltawm pilna in mailam anawt mahmah hi.
Aman agenna a tuabang chounate pen mipi kivaipuohna ahilouleh sum leh pai a suhvengthei ahisih hi.
“ Tuabang buainate pen sakhuo tungtawn a itna kamteng” “ itna in khotuona anei a, midang lunsim leh deidan pompihna, tualeh kibatlouna leh kimudanate paikhiat a kipomsiam tuahna ahi chin agen hi”.
Minister pan agenzelna a sakhuo lamkaiten kithutuohna ding, kihoutuohna ding leh kilemna ding in mopuohna lianpi inei uhi chin agen hi.
Aman Indonesia tungtang agenna a minam tuomtuom tengkhawm hinan uleh buaina umlou in ateng khawm uhi chin gentena in ajang hi. Tuikulh gamte a tenna inn 17000 val a um ua, chi leh nam tuomtuom aza asim a um ua, sakhuo tawndan tuomtuom tampi aum a, hinanleh kideidanna umlou in agamsung khantouna ding in pan ala chiat uhi.
Nasaruddin in Istiglal Declaration 2024 a phamta Pope Francis leh Muslim lamkaite toh “ Tunnel of Friendship” Jakarta’s Istiglal Mosque leh Cathedral of Our Lady of the Assumption tungtawn a kithukimna ana bawl ukhu alang alang kipiahzawna ahi chin agen kia hi.
Indonesia in leitung pumpi a sakhuo leh pu-le pa tawndan tuotuomte jiah a kidaidanna umlou a tuate jiah a kipumkhatna leh thahatna ahing tun ding ahi chin deisahna apia hi.
FABC assembly thulu toh kituo in, “ Pawlpi kisiemthana ding ahatna leh Lei dohding leh bawltu ding a Asia gambup asawl na ahi.” chin Nasaruddin in hattuom pawlpi kalsuon khawmna toh Indonesia tawndante musyawarah ( ngaidan kikup khawmna) tualeh gotong royong ( kilung tuohtah a pankhawnna ) kihoutuo ding, va kihel ding, vantang hoina ding a pankhawm ding agen hi.
Aman agenjelna a kikhop khawmna pen sakhuo tuomtuom kihou khawm a, mihing hina a pankhawmna, tualeh Asia gambup sung lemna aum na ding a panlah ding ahi.
Jakarta mun pen lemna hing piankhiat na hing hita hen. Tami kipawlkhawmna in ki unauna hing sukip henlen, tualeh Asia gambup in leitung pumpi a kikhenna hilou in sakhuo tuom tuom a omna pat pankhawmna, hatna hing hita hen chin agen hi.
Nasaruddin 12th FABC Plenary Kikhop khawmna pen official tah in honna anei hi.
