KICHANG NGAILUT VANGAM TO KIGAMLATNA AHI
Simding: Luke 16: 19-31
Mihaopa le Lazarus thusim hin thinung hinkho goh hilouvin tu damlai sunga ikom'a genthei hahsa kimumosah a kichang ngailut dihlou dan eihil'u ahi. Hiche thusim hin mi tampi hinkho akikhelsah in minomsa tampin hahsa genthei kithopi lou akhoh dan hetdohnan aneiyun hijeh chun ama nopsahna dalhan gam hahsa le migenthei ho kithopi din ahinkho aphaldoh un ahi.
Jesun asei, Mihaopa le Lazarus thusim hin mikhat doctoral degree thum, medicine, theology le philosophy amusah in kum 47 jen Africa gam genthei hahsa ho kithopinan hinkho ana mangin ahi. Viena, Austria university a mihil hina adalhan ahinkho pumpi, mihaosapa banga ama chang ding bou gella migenthei Lazarus donlouva ajona a vangama genthei tah a umding deilou jeh in Africa gam mi genthei hahsa kithopi din ana kiphaldoh in athi chan geiyin hiche kouna na chu atongin ahi.
Akum 38 alhinin mijen doctor in apang panin, akum 43 lhinin Africa ana jonin gammang lah a Hospital aphut doh in amin, Equatorial Africa asah in ahi. Kum 1965, ama kum 90 lhin jouvin ahinkho Africa a anamang chaitan ahi. Ama hi koidang ahipon, Dr. Albert Schwitzer, 1952 kuma Nobel Peace Prize mupa chu ahi. Ahinkho pumpi chu Mihaopa le Lazarus thusimin akheldoh a athi chan geiya hahsa genthei kimumosah louva ahahsatnauva kon a kidona dia kiphaldoh anahi.
Mihaopa le Lazarus thusima kona hi Dr. Albert Schweitzer chun Europe gam haosa hon gam genthei hahsa Africa kimumosah louva kithopi angaiye achuti loule vangama Mihaopa ibah diu ahi tia natoh a ana pohdoh ahi, akiti. Pope John Paul II in New York Yankee Stadium a 1979 kuma thu aseina a, "Mihaopa le Lazarus thusim hi ihinkhouva chin jing angaiyin, eima nopsahna, haosatna le chamlhatna jeh a ikotbul'a tulai kumjabih 20 Lazarus ding jing hi kihetmosah lou ding ahi" anatin ahi.
Ilah-uva tulaiyin jong Lazarus aumjinge. Ikihetmosah diu ha ahiloule ikithopi diu ham eiho khut a um ahi. Amonga eiho khat cheh hi Lazarus ihim ahiloule mihaopa ihim khatpen ihiu ahi. Hoijoh ihiu phatah a ikivet phat-u angaiye. Hahsa kimumosah a vangama mihaopa bah sangin Pakai dei bolu hitin hahsa genthei kimumosah louvin kithopi joute tia katem nahiuve.
Dr. S. Chongloi
