SIL KHAT NA TASAM HI
Jesun a dawng a amanu kung ah, “Martha, Martha, siltampi na ngaituo a buoi na hi. Hinanleh sil khat na tasam hi, Mari in tanhoi a telta, tua khu lahpieh ding ahi sih,” achi hi (Luk 10:41,42).
Tam mun ah Martha leh Mari in Jesu a vaitun dan uh kibang lou kawmkal ah, anasepsah a buoi mama Martha sang in, ama toh hunzang khawm Mari tung a Mangpa kipahzaw na thu i mu hi. Mari in ahileh, Jesu kengbul a tou in a thugente a ngaikhie hi. Tam thute akipat in Mari in Jesu mama ngaina a, a kengbul a um nuomsa a, athu gente ngaikhieh a zil nuomsa pen ahidan i muthei uhi.
Martha in ahileh, a nasep a abuoi mai deikhop lou in, Jesu kung ah a sanggam nu ama nasep seppi ding a sawl ding in ava ngen hi. Ama lunggellou lam tah ah Jesun ana dawng a, sil tampi ngaituo a pum buoi lou ding a thuhil kawm in, Mari tel bang hamphatna tel sam ding in a thuhil hi. Tua khu bangma dang hilou in, Mangpa kengbul a tou a, a thugente ngai khieh khu ahi. Eiten zong tuami mama i kisap pen uh a hi ngei ding hi.
