Nahinna leh nadamthei nading mikhut a na ap a na khut nakenga leh na awm lah a khau ang kivaw a tualeh zun leh eh thah ding nangon panpi nangai chiengin beidonna khat akinei hi.
Tami hunte ah nang leh naziet navei a um zatou a na umkhawmpite mihing mai ihina hilna eikinei ahi. Na hin sungin lawchinna tuomtuom te nei tama lechin mihing khat shi leh sa mai ihibou uhi.
Tamte hi zatou inn a kum 2 sung awp natna leh kakhut kakeng pia theilou jieh a kizen a ka um sungin chien tah in kahing theisiem hi. Pasian hepi nazal in zatou te’n suichienna anei jou in natna huoisiepi ana hisih hi. Hitamaleh tami hunte’n mihing innkuon khat ihina uh ei theisah ahi.
Ka awp nat tunga zatou inn ka umlai in ka gei ah numei khat alum a, anatna a huoisiet tuoh mama ahi. Achi kithing pum a akaa hun leh aza neh ding aneh nuomlou hun atam hi.
Hun khat in, nurse te’n akep laitah un azun a eh ang te hi. Nurse te’n puon ang nokhai pai ua amanu asusieng pai uhi. Khat in anam tha nadingin sen namtui ang the pai hi.
Ka ann neh hun laitah ahia keijong tamte’n kisubuoi sah lou in athimaw kakipang hi. Nurse te nasep ka patat mama hi gang tah a ang suh sieng dan uh. Tamte hi nisim a abol uleh anasep uh ahi chi kagel chieng in ka zatatna akibelap hi.
Hun dang khat ah, zatou inn lupna eikipieh ding ngah a ka umlai in tehsepi khat anatna athuohla jiehin inn ah ei kinuale sah ta un chi’n a aw neiteng toh akikou hi. Zatou te leh nurse te’n aw neem nou toh houpi in amanu ahamuon uhi.
Tami hunte’n mihing nat leh sat dante eimusah hi. Tamte hi zatou inn a na umlou hileng kamu vawt sih dinga tualeh kingeimkhietna thupi tah in eihil ahi.
Tualeh nadam theina mikhut a kinga ahi chiengin, damlou a umte khat leh khat tungah ki khotuona a um hi. Tami hun a thei dinga kilawm pen ahileh damtheina lam-et pum a kinepna toh tami lampi zawt khawm ihi uhi chi ithei ding uh apoimaw hi.
Tami hun in kiletsahna leh thupina maiphaw isut khiet ua, mihing khat chiet a ikumu ua hinna lamzawt kham ihi uhi chi i thei hun uh ahi.
Tamte hi kagel chiengin ibeidon hunlaitah in Pasian in ei thuhil nuom khat a um hi, koi ihi ei- Ama hepina leh zangaina tunga kinga atate.
Tami hun laitah inzong damtheina dingin khat leh khat thunget piehna i poimaw dante igeldoh a, tualeh mihing hina a kipawlkhawmna poimaw dan zong ei ensah hi. Khat leh khat hatlounate genkhawmna leh ngaidan kikupnate pan in khosung leh kipawlkhawmna dettah apieng hi chi katahsan hi.
Aliemsa American siempu leh laigeil khat kagel doh a, Father John Powell, tambang in thu ana gen a, “Mihing inuikhawmpi sate manghil abai a, ikaa khawmpite aki manghil thei sih hi”.
Koima zatou inn juon ding kichi athanuom a umsih hi. Hinanleh Khristien hina toh, tamte hi Pasian in thu eihil nuom chienga eihil dan lampi khat in kamu hi- kumtawn a dam ding ihisih a, ipawlpi panpina ipoimaw a, tualeh atawp tawp na ah tam ileitung hinkhuo uhi i innpi tahtah uh zuon a ikalsuona maimai uh ahibou hi.
Christopher Khoo
