‘Sakhuo dang a umsih hi, I innvengte Sakhuo ahijo hi,’ chi’n Bangladesh a siempupi khat in gen

Federation of Asian Bishops’ Conferences (FABC) 12th Plenary Assembly July 20 a Jakarta a hawn ahi ding jieh in Bangladesh a Catholic Bishops’ Conference president, Dhaka a Archbishop Bejoy Nicephorus D’Cruze, OMI in Asia gam a sakho tuom tuomte kihoukhawmna nei nading tungtang ah Pawlpi kipieh na athuuh jo sem nadingin ngetna anei a, ginna dangte khu “sakhuo dang” chilou a “innvengte sakhuo” chia etdan apoimaw thu agen hi.

Assembly nei masanga Radio Veritas Asia a video message a share ah Archbishop D'Cruze in plenary thupi, “Asia a mipi pangkhawm a kisiemthana leh Pasian nasep nadinga lei leh leidawte ihina nadinguh” chi a ngaituo a, sakhuo leh hindan/tawndan tuom tuomte pan a kimelchi Asia gamkai adinga poimaw mama ahi achi hi.

Archbishop D’Cruze in, “A thupi Asia gam adinga kituoh leh kilawm mama ahi,” a chi hi. “Pawlpi hi kipawl khawmna, panmun lahna leh mission nei, mi dangte thugen ngai, sepkhawmna, ginna, hindan leh tawndan kikal a kizawpna siem dinga hat ahi.”

Bangladesh adingin Muslim te khu zaa a 90 vel ahi a, Khristiente khu zaa khat sanga tawm ahi a, lampi siemtu hidinga hatna khu pastoral vision mai hilou in nisim a sil tung ahi, achi hi.

“Bangladesh gam dinmun a dingin kitheisiemna, kipawlkhawmna, sepkhawmna leh kilemna siem dinga kihoukhawmna leh sakho dangte zana hi a poimaw mama hi,” chi’n Archbishop D’Cruze in agen hi.

Archbishop gen dan in Pawlpi in ginna dang a theisiem dan hi kum tam tah sung khu nasa tah in ahing kikhel danglam a hi.

“Sakho dangte a Hagau Siengthou umna leh ahoina imukhiet hun ahing tungta hi,” a chi hi.

Tualeh, “Sakho dangte hi ei a dinga sil danglam khat hilou a, ka innvengte sakhuo ahi chia i ngaituo jo ding ahi,” achi kia hi.

Pasian Thuhoi Thupha in na innvengte lungsiet un chia thupieh pan a athugenna ah Archbishop D'Cruze in Khristien techi dihtah hina dingin midangte ginna za angaim hi, achi hi.

“Innveng chi hi Khristiente adingin sil manpha leh poimaw mama ahi, achi hi. “Na innvengpa sakhuo na zatat sih leh  na innvengpa na it thei sih ding hi.”

Archbishop in Bangladesh a Catholic zilna munte khu lampi siemna adinga et-tena a zahthei ahi thu agen hi. Zillai tampi khu ginna dang mi hitamaleh, sanginnte’n sakhuo kikhen tuomna paimang thei lawmta hina a siem a, aneulai ua kipat in kiza tuona siem dinga pui a hi, a chi hi.

FABC kikhawppi poimawna tungtang thu gen in Archbishop D’Cruze in, “FABC hi kimukhawmna mun ahi a, iki hilna mun uh ahi, Asia gam hi sakho tuom tuomte leh hindan/tawndan tampi umna gamkai ahi a, sakho tuom tuom kihoukhawmna lampi a ikipiehna uhi isiem tha kia thei uh ahi, i sepkhawmna ua kipat in lampi hoi jo isiem thei uh ahi,” a chi.

Jakarta a kal khat sung zet kikhawppi neina ban ah en in Archbishop D’Cruze in Asia gam a sakho tuom tuomte umkhawm theina khu Pawlpi pum huop leh khovel adinga silpieh thupitah ahithei ding akinepna thu agen hi.

“Ni khat ni’n Asia in khovel et-te dingin lemna leh unau kikawp dan akilangsah ding hi,” achi nalai hi.

FABC in Plenary Assembly a 12 veina ah kikupna anei nadingah Pawlpi in gamkai sunga sil tuom tuom tungte adawn kawmkal in kipawlkhawmna, panmun lahna leh mission hatsah thei ding dante aki ngaituo ding hi.