Malaysia gam a Petaling Jaya khopi a St. Ignatius biehinn meeting room ah cancer natna neite’n mitampi’n atheilou atangthu te uh asut zel uhi.
Tami Parish hi Archdiocese of Kuala Lumpur neia um ahi.
Mi 40 vel kipawlkhawmna ahia, atamjo hi cancer natna toh dam nalai leh damlam manaw te ahi ua, tami kipawlkhawmna hi apeisa kum sawm masanga nakipan ahia Family Life Ministry of St Ignatius Church neia kipawlkhawmna khat ahi.
Archdiocese sunga parish tuomtuom pan a hing kalsuon in tam memvberte’n ha siel in tami kikupkhawmna St. Ignatius biehinn ah ahing mang let uhi. Tami natna in tahsa leh lungsim asukha dan, kikep dingdan tualeh mailam hun a kizen dingdan tea gen zel uhi.
“Sil neu tampi hi tami natna neite maimai in atheisiem hi,” chi’n Percey Chiew 2016 kum a tami kipawlkhawmna a natel in agen hi. “Alailim lah ah kouma leh kouma kichiemnui in kanui let uhi,” achi hi.
Kum 68 mi Chiew in tami tangthu asut te ua kipat in natna neite’n anatna uh pawmdan leh lahdan asiem sah hi chi agingta hi. “I ha gen tan ua, azangkhai ahi,” achi hi. “Khat leh khat tunga Khrist mel muna in kinepna lienpi ei pie hi.”
Tami kipawlkhawmna a mi atamjo hi St. Ignatius Church neia um ahia, hinanleh apoimaw leh atel nuom tapou chiel leh vaidawt ahi. Khen khat atha kiem leh aki at jieh un thachau in tami kikupkhawmna ah atel thei nonsih hi. Hitamaleh phone tungtawn leh inn a vena te leh thu nget pieh nate pan in akikawm tuo zel uhi.
Kum 43 mi Caroline Joseph in tami kikupkhawmna a tel dingin nai 3 lampi ah ang peizing hi. Amanu hi Church of the Visitation parish mi ahia, ovarian cancer anei in bangdinga Pasian in Katunga tambang gentheina eitut ahiei chi’n ama leh ama aki ngaisut let hi.
“Hun tomkhat jou in Khrist kei adinga kikhai lia ahi chi kang thei a, Topa’n ei ze-etna ahi kachia thuo hatna kangen hi jo hi,” achi hi.
Mi tampi tami kipawlkhawmna pan in lungsim leh hagau lam ah phattuom pieh mama uh.
Kum 78 mi Francis Khoo gen dan in tami kipawlkhawna hi “apoimaw mama leh amanpha mama ahi,” adieh in dammaw hasatna thuoh hun a thungetna a khat-leh-khat kithei tuona ah.
“Athupi pen ahileh kizenna tungtawna damna nga nading ahi,” achi hi. “Thungetna in Pasian eitoh a umkhawm hi chi hamuonna ei pieh hi.”
Throat cancer natna a akikep a anatna akithe zah jou in Khoo in a aw atan lo hi. Radiotherapy ani vei nadinga kibawl kiading azau huoi jieh leh zeng a umthei ahi jieh in, aki at ma angai hi. Ahamtheilou jieh in atangthu laigiel tungtawn in agen a azi in asim pieh hi.
“Mi kamtam kana hi jieh in kada mama hi,” achi hi. “Hinanleh lungsim khongaina leh thungetna tungtawn in, muonna kang mu pan hi.”
Kum 75 mi Ann Poon hi breast cancer aneijou a aniveina nadingin tami natna anei kia hi. Akha nei ah khollou in nat athuoh a tua khu cancer chi dang khat anahi hi.
“Hat kaki sa nalai mama a radiothetapy apan in side effect zong tami kanei sih hi,” chi’n amanu’n agen hi. “Dam a ka um nalai kakipah mama hi.”
Kum 70 mi lymphoma toh kizen Kim Ang in tami kipawlkhawmna a sil neuneu kibawl te’n khenna tuomtuom ang nei pan hi achi hi.
‘Zingpha’ chia laihah te’n kaning anakitelsah mama hi. Hinanleh tami kipawlkhawmna tungtawn ah atuom vilvel hi. Koi ahiei khat in zingpha ang chi chiengin, tuni’n kadam nalai a tualeh thupha nga ihi chi ei theisah hi.
Kum 79 a upa Pi Pauline Ng in thyroid cancer tungtawn a akizenna tungtang thu agen a radioactive iodine therapy jou in ni sotpi tah amatang a a um thu agen hi. Tami hi kum 10 val uterine cancer aneijou ahi.
“Ginna in tamte ei maituo sah tho ahi,” achi hi.
Ng leh kum 66 mi Stella Voon hi tami kipawlkhawmna phutkhie a napang ahi gel hi. Voon in tuni tan in tami kipawlkhawmna a hingtel tholou mite akikawm tuo pi zing nalai hi.
Tami panpina hing kipatna zungpi khu Chiew in cancer anat chil lai ahi tabou hi. 1994 kum in breast cancer natna nei in tamvei pi ana ki-at hi. Australia gam a Perth khopi ah zong major bypass procedure ana nei kha hi.
Tuami hunlai in, innsung mite leh lawm leh guolte panpi na ah ana kinga hi. Ang phatdawm lam in cancer natna neite adinga tami kipawlkhawmna phu ding hi ana lunggul mama hi.
Australia a um in amanu Church of the Infant Jesus a um Carmelite siempu Sunny P. Abraham toh ngaidan akikum gel a, ana hanthawn hi.
2015 kum a Malaysia ang kinuale in, Chiew in St. Ignatius biehinn ah parish a vai tuomtuomte ah pan ana la hi. Akum kia in Family Life Ministry coordinator Shelagh Nunis panpina leh parish priest Andrew Wong phalna toh tami kipawlkhawmna hi phukhiet in ana um hi.
Tami kipawlkhawmna pangte hi ha siel a kiginni nivei ni ah akisutuo ua houlimna leh kizen dingdan te akikum uhi. Tu sot nailou in Jesuit siempu cancer natna nei Larry Tan in athugenna ah ihatlou laitah un I hagau hatlouna entup vai achi hi.
Kikupna leh houlimna ban ah tami kipawlkhawmna in tha leh zung a panpina zong apie hi. The Family Life Ministry in vitamin tuomtuom te, amla, vitamine C a hat Indian gooseberry te ahawm ua tualeh mipi kisapna leh apoimaw uh theisiem nadingin coordinator Leonard Lim tami kipawlkhawmna ah atel gige hi.
Hun khat inzong Lim in tam kipawlkhawmna a memberte’n Church of St. Jude a zinna siengthou aneithei nading un apei nading uh angaituo pieh hi. Church of St. Jude hi Petaling Jaya pan a km 30 a gamla ahi.
2017 kum in Chiew in apasal colon cancer jieh in ana tanlo a, amanu’n tami kipawlna neukhat in tahsa hatlou mite dingin pan nasatah lava chi agingta hi.
“Biehinn hi mipi’n theisiemna, hagau lampuina tualeh kipawlkhawmna muna mun ahi,” chi’n agen hi.
Amanu’n atangthu te hi My Journey with Breast Cancer Continues chi laibu in agiel hi.
Hasiel a tami kipawlkhawmna a hing ki suttuo te dingin tami kipawlna hi thungetna, kihou khawmna leh khat-leh-khat thuohna kitheisiem namun leh natna toh kimaituo khawmna mun khat ahing hita hi.
Translated by: William Zo
