Ngaina in siempu khat kichi khu taumai a ding diing mawng ahi. Hitama lezong, Topa Khalil Maqsood in thutah asui nuom jieh in taumai leh a siempu dinmun akansan a, thudih thuman sui kipanta. Suolam Pakistan a Faisalabad Diocese a tote khat ahia, Samundri gamkaia St.Mary’s Catholic Church a topapi (parish priest) a pang ahi.
437 GB kichi khuo ah sil hoilou khat apienga, Topa Maqsood in akan pai ngal a, amahaw leh amahaw kihung jouloute panpi dingin ahing kipanta hi. 437 GB khuo ahileh louhou khuo ahia, Punjab Province a Faisalabad District in ahuop ahia Samundri gamkai sunga um ahi.
Apeisa April 4 ni’n, kum 16 a upa ngahnu, Muskan Riaz, pasal li in apaubawl ua, limpia azai ua meihui tongsan ah akhang uhi.
Muskan paneu, mittaw Hanook Pasih, kum 48 a upapa in thukhenna inn ah tam thu atut a, mizawngkhal leh mi kipamkoite kihelbawl dan thu agen panta hi.
Hanook in dan dungzuia thutah adel pen ana kidonse pieh sih a, tuajieh in Topa Maqsood in panmun ahing la panta hi. Thusai lasaite kunga tam thu atun thei nadingin ama’n lai suttuo dingteng asuttuota hi.
October ha 2025 kum in, ngahnunu paubawl pasal ni thong pan in akitandohta ua, hihanleh amani’n ngahnunu innkuonte agalgih ua, nei hehna lai uh ladohta un achi uhi. Topa Maqsooh zong agalgih ua, tam innkuonte panpi nawnsin achi uhi. Hinanleh Topa Maqsooh adeu vawtsih hi. “Kei dan dungzuia thukhen guoh sui kahisih a, Pasian siemsa mihing pichinna sui kahi zaw hi” achi hi.
Hichi’n Hanook leh Muskan thukhenna inn ah azawpi let a, mimante (police) thudohna ah zong apanpi jel hi. Tuatham lou in abitna dingun thu ha nget in anget pieh hi. Ama panmun ahing poimaw deudeuta hi. Ngahnu Muskan in akipaubawl apuohnatna ah zong hamuonna apie jel uhi. Amanu’n akipaubawlna limpia meihui tongsan a kithejah khu apuona mama hi.
Akigalgih vangin Topa Maqsooh azau tuonsih a, thutah tun nading asuia, Pasian nasep in anei vawt hi. Sil umdan ahing huoisie deudeua, April 12, 2026 ni’n ngahnunu paubawlte’n apaneu Hanook inn ahal piehta uhi. Topa Maqsooh in a innkuon un apuia mun tuom khat ah ahiemdoh ua, giena ding leh anntang tuibuh aguon pieh hi.
Tutan in bangma thukhenna aum naisih a, Topa Maqsood zong alung kie tuonsih a, ngahnunu kipaubawlna leh apaneu inn kihal pieh tungtangah thutah adel nalai hi.
Thudih thuman akidel nalaia, tu-le-tu in Christian True Spirit (CTS) kichi, Katholik NGO khat in dan toh kisai in Muskan leh Hanook apanpi gige uhi. Hichi’n tami innkuonte’n thutah tun nading adel nalai ua, dan dungzui in thu kikhen heh chi’n vai ahawm jel uhi.
Topa Maqsood in CTSte panpina asanga amahaw panpina toh migiloute matsah teitei ding asawm hi.
Hanook Masih in Topa Maqsooh apatat mama a, “Kei kahileh, mutzin a um kahi, ahi’n Topa Khalil Maqsooh pen ka mit ahing suoh hi. Ka inn ei hal pieh ban un ka hamuonna amangdoh toh akibanga, ahi’n Topa Maqsooh in ei huum nalaia, tutan in hangsan thaw ing” achi hi.
Asher Sarfraz, CTC saipa’n ta siempupa apatat mama a, “Ama nasep hi pawlpi in mipi phattuom nadinga asepte ama’n atangtungsah a, akihung jouloute aw ahing suoh a, hichi’n thudih thuman tungsah hi Pasian nasep ahing suoh hi” achi hi.
Tua 437 GB khua a inn vam enlei, sietna ziet leh vei ah aum hi chi akilang mama a, Topa Maqsooh nasepnate in akihunglate hutkhietna ahing umsah hi.
