HAOSATNA THUGUH
Simding: Matthew 10: 42
Vannoiya haosa le minthang, Henry Ford chun anoiya natong khat adongin, "Nahinkhoa ipi hiding natup ham?" atile amapan, "Kahinkhoa katuppen chu Million dollar khat neipa hiding hi ahi" atin ahi. Nikho phabep jouvin Henry Ford in hichepa chu imakhat ahilnom jeh in mitbeh langtoa avetna ding (lens) laitah a silver dollar pum ni (siki ni) ato peh in agapen, akibehsah in, "Ipi namu em?" tin adongin ahi. Amapan, "Imacha kamupoi" atin ahi. Henry Ford in, "Hichu phatecha ipi kiseina ahi nahet le dollar ho nalampia hunga ahitai" atipeh in ahi.
Chunga thusima Henry Ford in ahilnom chu paisa tampi neiding itup a paisa bou akivet gunset teng imacha kimu thei lou ahi. Mitbeh lens khel a kikoi paisa pum teni chu akilahdoh teng mihem dang dinga thilphachom tampi bolthei um ho kimu theiji ahi. Paisa tampi nanei nom le mipia din napha tongin anati ahi.
Phat khat a vannoiya mihaosapena kihe, Bill Gates jong College chaijoulou mi ahi. Hinla atup le adoipen chu vannoi mijousen aincheh a computer aneiding hi anahin mipi dinga thilpha khantouna atoh chun vannoiya mihaosapen asodoh ahi. Paisa nei chu ase ahipoi. Paisa beiyin ihithei pouve. Hinla paisa hi thil len le midang dinga thilpha tampi boldohna apanna inatoh chun paisa neina thei thaneina (rights) eipeh teng achamlouva paisa inei jeng diu ahi.
Jingkah Devotion ihin boldoh-uva kon hin mihon Pathen na atoh dan kidang kasah tampi kamudoh in kakitilkhou lheh in ahi. Abang paisa tampipi toh a apehnom apeh diuva lekhabu phabep ithot le ama chan ding jong kilah louvin aganna gangin lekhabu jat man ahinthot un, abangin copy kithot jat ken ana kijoh tange tin amumun aman ding eihin thot paiyun, abang aji achatoh eihung kimupia Pakai natohna pang aumin chule abang lhaseh le hijat in pang inge ti aumin ahi. Jesun, "Dihtah a kaseipeh nahiuve, kaseijuite lah a aneopen khat hijong leh seijui ahina jeh a twidap khon khat pejeng jong chu kipaman akisan tei ding ahi" ati.
Lasempan, "Ngailutnan kot lentah ahong, Van leng kin bolna dingin; Twi vat khat le thing hal khat, Mukham hilou tincheng ho hi; Van gam gouva sodoh theina" ati. Tulaiyin miching hon leiset a anei le agou tampi vangam nei le gou akiso gam tauve. Suhmil lou ding chu, vangam nei le gou kisodoh ho chu inna ahiloule bank a ikikoi hou ahipon, Pakai natohna dia iphaldoh houjoh ahiuve. Hijeh chun leiset a goh hilouvin vangama jong haosaute tia katem nahiuve.
Dr. S. Chongloi
