Luke 10:25-37
Kumtawn hinna mu ding dan
Tualeh ngai un, dantheimi khat ahing dingdoh a, ama ze-etna mawng in, “Siepa aw, kumtawn hinna ka ngathei nadingin bang kabawl diei?”chin adong hi. Aman akung ah, “Dan laibu ah bangchin akigiel ei? Bang nachi sim ei?” chin ale-doh hi. Khumin aman, “Topa na Pasian khu na lungtang jousie, na hinna jousie, na haatna jousie leh na lungsim jousie toh na it ding a, nangma na ki-it bang in na innveengte na it ding ahi,” chin adawng hi. Tualeh aman akungah, “Na dawng dih hi, tami bawl inlen, tuachin hinna nanei ding hi,” achi hi.
Samaria mi hoi gentethu
Khumin amapa kisiemtansah nuom in Jesu kungah “Koi e ka innveeng?” achi hi. Jesu’n tambang in adawng hi: “Pasal khat Jerusalem akipat in Jeriko zuon in apeisuh a, tuabep in aman suom haatte atuohkha a, amauten apuon ahawdoh pieh ua, avuo ua abupshi bep in anuasieta uhi. Tuatah in gintaatloupi’n siempu khat khumi lampi ah ahing suoh kha a, lampi pang langkhat ah apeelta hi. Tua mabang in Levi khat tua mun ah ahingpei kha a, amapa amubep in lampang khat lang ah apeelta hi. Hinanleh Samaria mi khuolzin khat tua mipa umna mun ah ahingpei kha a, aman a mutah in alungsietta hi. Tuachin akungah avapei a aliemnate sathau leh leenggazu anupieh a, hoitah in atuom pieh a, ama ganta tungah atuongsah hi. Khumin a zingni’n aman dangka ni aladoh a, zintunna inn neipa kunga pie in, “Ama hoitah in na keem inlen, tami baan a seenbe nanei leh kahing kile chiengin kahing pe ding hi,” achi hi. Jesu’n akungah, “Suomhaatte tuohpa dingin tua miteng thum lah ah koipen in innveeng hina a ensah ei?” chin adong hi. Khumin dantheipa in, “Ama tunga itna neipa in,” achi hi. Tualeh Jesu’n akungah, “Pei inlen, nang zong khum bang in vabawl ta’n,” achi hi.
