Tutung Jubilee Honna toh kisaia thuteng themkhat:
Jubilee: Kipahna
Pilgrimage: Zinna Siengthou
Pilgrims of Hope: Kinepna toh zintna siengthou neite
Cathedral: Biehinnpi
Jubilee Year: Kipahna Kum
Jiu mite'n Jubilee amandan uh:
Jubilee Year (Kipahna Kum) hi Leviticus Laibu ah chientah in ana kigiel hi. Tami Laibu pen siempute toh kisaia kigiel Laibu ahia, Pasian bie dingdan leh khuo leh tui kivaipuohna toh kisai Laibu ahia, leitang zah dingdan leh nasepna pat a kitawlduo dingdan tan ahuom hi. Leviticus Bung 25 ah lou haw dingdan leh, ahun ahun lou leh leitang nasan kitawlduo sah ding tungtang akigiel hi.
Jubilee kum pen kum 50 sungah akimanga, tam hun in lou kum khat sung ahihousih a, ganhing nasante akitawlduo uhi. Suoh leh salte akiha a, zalenna (freedom) akipie ua, tualeh leiba jousie akimaisah a, gam kilahpieh jousie akinuapieh kia hi. Mipi'n pawipi amang ua, kipah thanopna abawl ua, Pasian aphat uhi.
Kipahna kum kipat nadingin kelnguoi ki akimut hi.
Katholik Pawlpi sungah zong Kipahna Kum akibawl jel a, kum 25 sungin khatvei akibawl teitei hi. Ei Khristien Pawlpite dingin, Jesu ahing kumsuhna phawna ahia, ama'n ei hundamna lopna pawi ahi. Ahing tung ding kum 2025 khu Jesu in ei tatna kum 2025 achinna etsahna ahi.
Tambang Kipahna Kum (Jubilee Year) pen Khristien Pawlpi dangte'n amangsih uhi. Mang thei uhleh hoiva. Tambanga kum 2000 val sunga kimang pawlpite leh tawndan hoi tuomtuomte Katholik Pawlpi bou in chientah in amang hi.
Jubilee Kum akiman chiengin Rome Khuopi a Vatican Khuopi ah Pope in kot honna aneia, tua toh Jubilee Kum kihong ahita hi. Diocese jousie ah zong siempupite'n ase dung zui un ni khat aki tuom koia, tuani'n Jubilee honna akinei hi.
Tutung in Lamka Khuopi ah Good Shepherd Biehinn ah Jubilee Kum honna akineia, Pu Archbishop Emeritus Dominic Lumon in ahing lamkai pieh a, biehinn kaina akinei hi. RVA Zo Servicete'n LIVE Cast abawl ua, mun jousie ah akien hi.
Jubilee kum ah pawlpi mite'n Zinna Siengthou (Pilgrimage) bawlleh chi'n hanthawnna akipie hi. Zinna Siengthou pen eima in iteel thei ahi, agentena in India Gam a Goa ah, thungen dingin vapei lei tuakhu zinna siengthou ahing suoh hi. Lamka lam a dingin Good Shepherd Biehinn ah pawlpi mite thungen dingin ahing kuon ua, Mass Siengthou manna leh mawsutnate abawl ding ua, akile kiata ding uhi. 2025 kum a khatvei teitei pawlpi mite ava kuon dinguh deisah ahi. Tuama bangin Phaipi a St.Joseph's Cathedral ah zong pawlpi mite thungen dingin akuon ding uhi.
Kum kia January ha a pat in Rome Khuopi Katholik mite tamtah zinna siengthou nei dingin akuon ding ua, thu angen ding uhi. Zin tun nading hotel tamtah akisap jouta hi. Kum kia chiengin mun phat teitei ah zinna siengthou va mang vai chi'n Radio Veritas Asia: Zo Service min in ikichiel uhi. Zin Nop!!!
