Aid to the Church in Need (Pawlpi tasamte panpina) kichi, Katholik Pawlpi sunga kipawlna khat ahia, tami kipawlna in akum akum in anasep uh toh kisai in thuphuonna (report) abawl jel uhi. Sawt lou nalaia athuphuon khat uh ahileh, leitung ah jihadistste (biehna toh kisaia galsatte) nasep ahing kibelap deudeua, lunggim ahuoi hi chi’n agen uhi. Musolman pawl khat in a Pasian uh Ala min a gal sat ahia tualeh tam galsatna pen nasep siengthou ahi achi valong uhi. Tuathamlou in Muslim biehna pomsah ding ahi chi’n mi apaubawl uhi. Africa gam phasa khat ah kumpi nangawn in adou jousih uhi.
Tu leh tu a ahatna uh ahileh Sahara Desert nei lam, Sudan gam toulam leh Democratic Republic of Congo ah ahat mama ua, athuohla ahileh Khristien pawlpite ma ahi uhi. Amahaw toh kibang kipawlna dang khat zong aum a, amahaw ahileh radicalists (biehna lam a lungheina) akichi ua, amahaw ahileh Pakistan, Mozambique leh Democratic Republic of Congo ah ahat mama ua, mipi’n athuohla mama uhi. Muslim jousie akibangsih uhi. Jihadiste leh radicaliste biehna atuom a, Muslim dangte’n zong athuohla uhi.
Tumlam (West) mite’n zong athuohla uhi. Agentena in 2023 kum in France gam ah 1000 vei radical Muslimte tatkhielna athuoh ua, atamzaw biehinn suhsietna leh biehinn kaite thana ahi. Greece gam ah 600 vei biehinn asusie ua, biehinn kaite athat uhi. Jihadiste leh radicalte gamtatna thuohla mi 5.4 vel apha hi.
Aid to the Church in Need in agen dungzui in, tambang gamtatna kiem tahzaw sangin akibelap zaw hi. Hichia amahaw bawlsiet jieh a gilkiel dangtana tunna gam ah, Aid to the Church in Need in anntang tuibuuh ahawm jel ua, khatveiteng akichingla let hi, ajieh pen mi galtai akibelap a, galtaite dinga anntang tuibuuh kihawmte alah pieh nalai uhi. Tu leh tu in Sudan gam a Muslim helpawlte’n mi atultul in athat ua, mi a million lam a lengin agaltai uhi. Tambanga amahaw gamtat hi leitung mite dingin sil dahuoi khat leh thuoh zing ding dinmun in um gige.
