Zani, September 2 ni in Pu Pope Francis Asia Gamkaipi Suhsuolam (South East Asia) zin dingin akuonta a, kal ni vel ahing tham ding hi. Pope ahisunga dingin akhuolzinna sau pen ahi ding hi. Pope Francis hi kum 87 a upa ahita a, khuol azin thaw nalaia, lamdang akisa hi.
Tutung akhuolzinna ah Indonesia, Pupua New Guinea, East Timor leh Singapore apha dinga, tam pen September ni 2 a pat 13 sungin a azin ding hi. September ni 3 ni’n Indonesia Khuopi Jakarta ah atu dinga, tam gam pen itheisa mabangun, leitunga Muslimte tamna pen ahi. Tana athului ding ahileh, biehna tuomtuom kisuhhal ahi ding hi, adiehdieh in Muslimte leh Khristiente kikal ah.
Jakarta Khuopi ah Katholik Pawlpi a siempupite, siempute, ngahnu siengthoute, tangval siengthoute, siempu sinte leh thuhil siete Biehinnpi Cathedral of Our Lady of the Assumption kichi ah akimupi ding hi. Indonesia kumpipa Pu Joko Widodo, September ni 4 ni’n kumpipa inn ah akimupi ding hi. Tuajou in tam gam a Muslimte biehinn lien penpen, Istiqlal kichi ah biehna tuomtuomte kikuptuona ah apang ding hi.
Tua jou in September ni 6 ni’n Papua New Guinea ah aleng dinga a, Port Moresby, tam gam khuopi ah atu ding hi. Papua New Guinea ah Katholik pawlpite million 4 pha uhi, tualeh Khristien pawlpi tuomtuom lah a tam pen ahi uhi. Tam gam atam sungin kumpi leh biehna tuomtuom a lamkaite akimupi ding hi. Pope ahing zinna thupi ahileh “Thu ngen un” (Luke 11:1) ahia, Papua New Guinea siempupite’n ana teldoh uh ahi.
September 9 -11 sungin East Timor ah Pope alengsuh dinga, kumpi leh Katholik Pawlpi lamkaite toh agam khuopi uh Dili a Cathedral of Immaculate Conception ah akimu ding uhi. Esplanade of Tasitolu ah Mass abawl dinga mi asang asangin akikhawm ding uhi. East Timor ah se 97% Katholik pawlpi mi ahi uhi.
A zin tawpna gam ahileh Singapore ahi dinga, September 11-13 sungin gam lamkai leh pawlpi lamkaite toh akimu ding hi tualeh National Stadium ah Mass Siengthou alat ding hi. Pu Pope Francis in chinate, tehsiete leh khangnoute akimupi dinga, tuajou in St.Therese’s Home ava kawm ding hi. Chinate etkolna mun ahia, 1935 kum a The Little Sisters of the Poorte’n ana sat uh ahi. Atawpna ah Catholic Juniour College ah biehna tuomtuom a khangnoute toh thu angenton dinga, tuajou in Rome ah akileta ding hi.
