Philippines state university a Mass latna siengtho kinei laitah a bomb poh na ah mi 3 in sina tuoh
Apeisa December 3 ni’n Southern Philippines a state university a Mass siengtho kinei laitah in bomb apoh a atompen in mi 3 in sina atuoh a tualeh mi 40 vel in liemna atuoh uhi.
Brigadier General Allan Nobleza, regional police director gen dan in tami bomb poh na tungah pro-Islamic State helpawlte ginmaw ahia suichienna akinei laitah ahi achi hi.
Tami bomb poh hi Philippine military te’n pro-Islamic State helpawlte mi 11 atha uh thu aphuon zo uh ni 3 zoa poh ahi.
Lanao del Sur Governor Mamintal Adiong Jr. tami siltunga alungkimlona leh ademna thu aphonga, “Siem sinna sanginn te a hichibang gamtat na hi sil dihlo ahi”, achi hi
Caritas Philippines in akinthei banga sui a tami sil bawlte mat a aom nading un ngetna anei a tualeh Bishop Jose Colin Bagaforo, Chairman of the Social Action, Justice and Peace Commission of the Catholic Bishops' Conference of the Philippines (CBCP) in, “Tam bang sil hi Mindanao Week of Peace pawi ki siim laitah a ahing tun hi kada mama hi”, achi hi.
Mindanao State University in Facebook post tungtawn in, “Tambanga gamtat gitlona tungah aki lungkim sih a tualeh nasa tah in aki dem hi”, chi’n agiel uhi.
Tualeh thei dinga kilawm in Marawi khuopi hi kum 2017 lai in Islamic helpawlte’n lha 5 sung ana luo uh ahi.
#rvazoservice #rvapastoralcare #marawibombing
