Sahlam Cebu a Bogo khuopi 6.9-magnitude a haat zilkiling in aden jou ni sawm-leh-thum jou in October 13, 2025 ni’n zilkiling haat mama khat in zingmawng nai khat vel in khatvei toh ana deng kia hi.
Cebu Archbishop Alberto “Abet” Uy in social media tungtawn ah lai ana giel a, “Uleh naute ki enkawl hoi un tualeh thungen un”, achi hi.
Zilkiling jou nai nga jou in archbishop in Pasian Thuhoi Thupha Luke 11:29–32 pan in thugenna anei a, athugen laitah injong guohaat leh vaantou gin te jong akiza hi.
Catholic pawlpi in October 13 Fatima a Tounu Mari pawi anit a, hunpi a athugenna ah Archbishop Abet in tuami ni a mitampi in ni laam (Miracle of the Sun) ana mu thu agen hi.
Nu Mari in, “Thungen un, kisia in Pasian kungah kile kia un,” chia ana gen tuni’n eiten igam buaina uh neh-guh hitaleh, zilkilingte tungtawn in nu Mari thugen itheizing ding uh apomaw hi achi hi.
“Zilkiling in itenna innte uh, biehinn te asusie a tualeh hinkhuo tampi zong amang hi himananleh tamte tungah ei mihing in ibawlthei uh a umsih hi. Tamte sanga buoina lienzo khat ahileh gamsunga neh-guhna, kumpi nasemte leh kumpi nasepna munte a neh-guhna in mipi alungsou sah mama hi.”
Tami tungtang ah dohna khat anei a: “Fatima Pawi ni leh igam ua zilkiling ni akituoh kha adiei, awleh Pasian in eite kungah agen nuam khat um adiei?”
“Nineveh mipite mabanga, Pasian in eite kisiemtha dinga ei chiel ahi, imawnate ua kipat a khaglou in ilungtangte uleh isepna munte uh sawpsieng vai,” achi hi.
Translated by: William Zo
