Sr. Dorothy Adaha, FSP | October 11, 2026
North East India a Diocese of Tura sunga sanginn 60 a naupang 5,000 vel in October 7, Our Lady of the Rosary Pawi ni’n leitung pum huop a “Naupang million khat Khigui sutna” panlah na ah atel ua, lemna leh kidouna leh thagum suona jieh a gentheina thuoh naupangte ading in Khigui asut uhi.
Diocese huop sunga Parish, sanginn leh sakho pawl tuom tuomte’n Khigui sutkhawmna abawl ua, naupangte khawvel mun tuom tuom a telte toh lemna, Pawlpi ading leh gim genthei thuoh mite adingin thungetna aneikhawm uhi.
International initiative hi Aid to the Church in Need (ACN) te pan lahna ahia, October ha sung in naupang million khat Rosary thungetna nei dingin a chiel hi. Pope Leo XIV in tami pan lahna hi campaign hi apawm pieh a, naupangte toh October 1 ni’n Vatican ah Khigui asut khawm hi.
Tura Diocese panlahna a lamkai Fr. Benjamin in naupangte Khigui Thungetna theisahna in a ginna uh ahatsah a, midangte dinga thungen dingin a chiel hi, achi hi.
“Naupangte Khigui Thungetna hil hi a naupan lai ua kipat a aginna uh khausah nadinga lampi hoitah ahia, leitunga kilemna um nadinga thungen kawm in naupangte’n Khigui asut khawm chieng un ginna toh Pasian lam a kihei dan athei ua tualeh Nu Mari thunget piehna ngetdan athei zong athei uhi,” achi hi.
Tami panlahna in naupangte nisim hinkhuo ah Khigui sut zingna lampi ahing siemdoh ding akinepna thu zong agen hi.
“Tami kipiehna bailam tah hi a nisim hinkhuo ua a umden ding ka kinem hi,” achi kia hi.
A panlahna ua kipat in Tura naupangte’n khovel pum huop a thungetna campaign ah atel ua, tuami’n lemna suia thungetna leh gim gentheina thuohte toh kipumkhatna siemna lampi a naupangte panmun a tahlang hi.
Translated by: William Zo
