India mi khutsiem Sanil Augustine in tukum ‘’Kinepna lienpi toh zinna siengthou’’ khawmpi ah zading Logo na siem ahi.

Ahing tung ding November 27 to 30 sunga ‘’Kinepna lienpi toh zinna siengthou’’ chi thupi mang ah FABC saina nuai ah Asia gamkai sunga Katholik Pawlpi  milian, milal, atul-tul sim in Penang khopi, Malaysia a khawmpi mang ding uhi.

Tammi khawmpi man ah zah ding Logo pen India mi khutsiem minthang Sanil Augustine in Asia gamkai mipite, gamte leh ngaina tawndante enkawm in tuatoh kituoh in Logo hing bawl khie ahi. Logo pen Banner, T-Shirt, thongpi leh lukhu leh adangdang ajong ki zang ding hi. 

Sanil Augustine ahileh Kerala khopi ah um ahia, kum 20 val design tuamtuam abawl a, tuabana marketing leh communication siem mi khat hia, aman Popkon creative office jong anei a, tuana director jong ahi.

Sanil Augustine in, Khawmpi ah ding design bawl ding ahi chi organsier apat thu amu in, Asia gamkaite umdan, tawndan, hindan leh tasannate ngaituoh saupi nei in, Asia toh kituoh siem dingin tam logo hing bawl khie ahi.  Logo siem khiet dan hileh ama mai-mai ki bawl sah ahisih ah, khawmpi ah zahding logo siem kidemna hunsawtpi na um ah tuasunga mi azah-asang kidemna um hia, tuana Sanil Augustine logo siem pen FABC ten teltuam leh hoisah in Penang khopi khaawmpi a zah dingin phatsana nei uh ahi.

Sanil in a Logo siem pen khawmpi a zah dinga tel ahitah chi thuza chiengin Pasian kunga kipathu tangkou masa in, ‘’ka siemna ama ei piesah ahi jiehin ama minthanna ding leh hoina hitah hen’’  chin gen hi. Tualeh Sanil in genna kiana  ah ‘’ Logo ka siem tunglai in ka lungsim ah logo ka bawl jousie leh apah jousie khu mite’n Pasian phaw teitei leh chi lungsim nei pum ah ka bawl ahi’’.

Logo asiem dan leh akhietnate pen alim ah envai.