The 12th Plenary Assembly of the Federation of Asian Bishop's Conference (FABC) mun a chi leh nam tuomtuom te, pasian nasem te leh, delegates tuomtuom hing kalsuankhawm te kung ah mailam hun a tami leitung ki daidan gam a ki lungtuoh tah a kalsuankhawm ding leh pasian nasep na te a kijoptuana lei bawl tuh hiding in Asian hattuom ten pan lah chiet vai chi'n kihoukhom na mun te tahlang uhi.
Tualeh tami lunggel na pen July 23 ni in kihoukhomna mun 20 val apat in table conversation tungtawn in mu khiet thei in um a, tualeh tam tup leh ngim te tungtawn a Assembly mang ding a lamkai tuomtuom hing kalsuankhawm ten kituoh tah in thu ngaikhiet nalam leh sie leh pha khentel thei nalam a piching tah hun zangkhom uh ahidan tahlang sawn2 hi.
Tualeh tami reporting session hun a Bishop te, priest te, religious te leh lay delegates ten kihoukhomna pawl neuneu bawl uhi. Tualeh tami kihoukhomna a dotna giltah chi ni bang chin hattuom ten Asian gam a zat tuomtuom, ham leh pau kibang lou, tawndan tuomtuom leh mun tuomtuom te a bang chin kijoptuana lei abawl thei diei? Tualeh hattuom ten bang chi bang kikhel na apoimo diei chin dotna bawl uhi.
Tualeh lamkai peikhawm ten gaal leh sah a kimat tuohna te, nam politics vai a kikhenna te, gindan tuomtuom te, galtai te, economics kituohlou nate, gamsung sietna te, Artificial intelligence leh media platform khang hat nate pen Asian gam a hattuom te a ding in buoipi tham ching mahmah ahidan te gen in. Tualeh innsung buoina te, sanginn lam kitahsap nate, social media tungtawn a thuhoiloi kithe thang teleh khangdawng te lungtang a hikhuo umjie sui na te zong luikhie uhi.
Hinanleh mipi peikhawm ten tam te jauna in gel lou in hattuom ten pasien nasep thei nading leh panlah zosem thei nading a hamphatna ichikhat in gel zo uhi.
Migration ichi te bang gingtu khat mun tuomtuom a ang ki suon koi2 chieng in a ginna toi koi2 ahiman in apeina mun te a pasian thu apolut zel ah tamin mikhat ading in hamphatna tun thei a, tualeh Artificial intelligence leh media lam tungtawn a khangdawng te kung a pasian thu leh lampi dih kohmu thei nading hunlem bailam ta in guon zo hi chin hoi asah dan te uh talang uhi.
Tualeh Asian gam a ding in education pen tha hatna lienpi tuntuh ahi achi uhi. Catholic school, University, healthcare facility, charitable organisations leh social ministries mun te a hattuom ten ginna zal in mipi te panpi in kijoptuana lei bawl khe tu in pang uhi.
Tualeh church mission in 'bridge builder' hiding achi pen I hattuom sung lam a hing kipat ngai ahi, chin mipi peikhawm ten gen ua. Tuazieh in delegates ten mipi te, nupi papi te, khangdawng te, singtangmi te leh Hattuom mi ten panlah chiet in i tup leh ngim uh Synodality te muolsua na ding in panlah chiet vai chin hanthawn uhi.
Tualeh Asian gam a chi leh nam tuomtuom umkhawm pen hamphatna lienpi ahia tuazieh in thungai khiet siem ding leh mipi nautang te a ding a silhoi bawl chiet ding in mipi peikhawm ten gen ua. Tualeh hattuom te zong pan nasatah a lah in lemna bawlding, kim akieng te tawh ki tuoh ding, migration te, innsung kivaipuoh dan te, media leh Artificial intelligence te jat dan hoideu a en kai ding in hanthawn uhi.
Tualeh tami reporting session pen kiniel na hun a zangbei zoh lou in nitahlam thumkhom na te pangtou in leh tami table conversation te hagau siengthou in umpih zo ding in thumna tawh ahun te uh zang zoh uhi.
Tualeh tami FABC plenary Assembly pen lawhching mahmah ahi aziehpen hattuom synodal mission pen abul in table conversation tungtawn in hunpat hinanleh tami houlimna hunsung a delegates ten thu sie leh pha te khentel siemna te, pasian nasem te mohpuahna teleh Asian gam a hattuom te kibatlou nate uh ngaikhiet thei a aum zieh ahi, chi uhi.
Tualeh atawp nading in reporter pan hattuom ten ki lungtuoh a kalsuankhawm jing ding, khotang sung suhat ding leh i mission uh 'bridge building' hiding ichi te uh gasua pi chiet ding in a deisah thu puong hi.
