Democratic Republic of Congo Ituri province a um Komanda khuo a Katholik biehinn khat migilou thau tawi pawl khat in ana bulu ua khangnou tampi ana kap lum uhi. Tam migilou pawl te hi Allied Democratic Forces (ADF) Islamic kulmut pawl Central Africa a um te ahi uhi. Thau toh biehinn a naupangte leh khanglaite’n Siengthou Pumpi thungetna anei laitah un ana bulu uhi.
Akhuo mite thugendan in atawmpen in Eucharistic Crusade movement member mi 31 in ahinna uh atan ua, mi 6 nasa tah in aliem hi. Hitamaleh mi shi ja genthei chet in aum sih hi, Thusuo khenkhat in mi 43 in shina atuoh uhi chi thuphuon anei kia hi. Congolese army ten seppatni nitah tan in mi 10 shi chi aphuong uhi. Mi khenkhat thau a kikap uh ahia khenkhat pen aki haal uh ahi. Biehinn geia inn leh dawr umte jong vanteng ala ua ahaltum uhi.
Komanda khuo a siempu Father Aime Lokana Dhego gendan in khangnou pawlkhat biehinn ki bulu laitah in ana man ua, tualeh tuni tan in a umna uh thei ahisih hi. Congolese leh Ugandan forces te’n pan la in ADF te delmang sawm tama leh tami gam hi mineral vauna gam ahijieh in hun sawtpi apan a helpawlte’n ana deigo leh ana luo sawm jing uh ahi.
Translated by: William Zo
