Bishop George Mamalassery muolliem
![Bishop George Mamalassery](/sites/default/files/inline-images/Bishop%20George%20Mamalassery.jpg)
Bangalore July 5,2024(CCBI): Bishop George Mamalassery, Bishop Emeritus of Tura, July 5,2024 ziltawpni zingmawng nai 2:20am vel in Holy Cross Hospital, Tura, Meghalaya ah ana muolliem hi. Atuop hoi nonlou jieh in hunsawtpi ana kijen hi. Diocese of Tura, Meghalaya adinga Bishop masa nahi in kum 28 sung ana sem hi. Vuilliem na vaiguon pen thei chet ahi naisih hi.
Bishop George Mamalassery hi 23 April 1932 kum in Kerela gam a Kalathoor khuo ah ana pieng hi. Apa Kurian leh anu Elizabeth Mamalassery tate 3 lah a aneupen ahi. Kum 12 achin in taga ahita a, Diocese of Madras-Mylapore neia om Poonamallee khuo a Sacred Heart Seminary ah ana lut a, Kum 1950 apat 1960 sungin alaisimte ana jou hi. Northeast a Pasian nasem dingin ana kipiekhie a Rev. Louis Mathias D.D. in April 24, 1960 kum in siempu hina a suhdetna ana nei hi.
Archdiocese of Shillong-Guwahati neia om Garo Hills a gamsa leh malaria tamna mun khat ah Pasian nasem dingin akisol pai hi. Tura leh Baghmara a assistant parish priest in kum 10 asep jou in 1970 kum in Dalu a parish priest in ana om hi. 1971 kum a Bangladesh gal lai in galtaite dingin a parish ah omna ding leh ann neh tuidon ana pie hi.
February 8, 1979 kum in Holy See in Fr. George Mamalassery kum 46 ahi in Tura diocese a Bishop masapen dingin ana tel a tualeh Bishop hina a namdetna Macrh 18,1979 in ana nga hi. Bishop ahi sungin centre 14 omsate kehlien in biehinn, presbyteries, convent, dispensary, hostel leh sanginn om in parish tha 23 ana hong hi. Khantouna lam leh sum leh pai lam a gam hamsa ahi theijingin laisim na leh sanginn lam a pan nasa tah la in mun sip leh gamla lah ajong sanginn te ana hong hi.
Bishop Mamalassery in Salesians te leh Jesuits te ana chiel a Tura leh Williamnagar ah college ana kihong hi. Garo Hills a district 5 sungah dispensary 34 ahong a tualeh mi chinna 150 luptheina zatou inn khat Tura ah 1993 kum in ana hong hi. Anasep nate jieh in "Engineer Bishop" ana kichi hi.
Tua leh nat leh sat na lama siemna zil nadingin Tura ah Rino Simonetti School of Nursing ana hong a, tualeh Montfort Brothers te achiel a apiengmaw leh mibanglou te adingin Montfort Centre for the Physically Challenged ana hong kia hi. Bakdil, the diocesan social service centre kihonna dingin Bishop Mamalassery in pan nasa tah in ana la a, tun Northeast sunga NGO lienpen khat ahita hi.
A retire jou 2007 kum in Bishop George in pasian na asepna leh diocese akithuopina Priest’s Home pan in asem hi. Meghalaya kumpi in anasep nate thei pieh in Pa Togan Sangma lawmman ana pie a tualeh University of Science and Technology, Meghalaya in 2019 kumin siem sinna lang hileh nat leh sat na lam a apan lah nate thei pieh in honarary doctorate hina apie hi.