Bangladesh Muslim Dawr neitu khat in Catholic Pawlpi toh Kum sawmli sung kipawl khawmna siem

Asia gam a Catholic Pawlpi in “The Call to Synodal Conversion and the Mission to Be Bridges and Bridge-Builders in Asia” chi thupui zanga 12th Federation of Asian Bishops’ Conferences (FABC) Plenary Assembly nei dinga kisahkhawl laitah in, sakho dang dangte toh kihoukhawmna te leh kimutuona tangthu te’n khat leh khat kizatatna toh hindan nisim in muthei in a um hi.

Tuate ensah khat ahileh Bangladesh khopi Dhaka ah muthei in a um hi. Tuanah Muslim dawr nei khat in kum sawmli vel sung Catholic mite dingin Pasian limte leh lim siengthoute zua in pawlpi mite leh siempute toh kizawpna khat a siem hi.

Kum 73 mi Mohammad Abdur Rashid hi Dhaka a Farmgate area a Tejgaon Catholic biehinn geia Rashid Glass House neitu ahia, Jesu Khrist, Tonu Mari, Innkuon Siengthou, St. Joseph, St. Anthony, St. Teresa of Calcutta, leh Pope Leo XIV lim te frame a siem khu kum 1988 akipat in a sumsuina leh aneh suina ana hita hi.

Tejgaon Parish leh Holy Cross School geia um ahi a, Bangladesh a Catholic community lien pen te lah a mikhat ahi. Tami parish ah Catholic 10,000 val ateng a, tamte lah ah singtang hmun akipat nasem dinga Dhaka a pem innkuon tampi atel hi.

Rashid hi Muslim ahi a, Catholic Pawlpi toh akizawpna khu sumsuina hun lemtang akipat a akipan hiṭamaleh, kitahsanna leh kizawpna ah ahing khang tou ahi.

“College simlai ka hi a, lim suhtuona dawr ah na kana sem a, a nuasang in Farmgate geiah keima ngeiin nehsuina ka pan a, ni khat khu Bieh Inn geia kapei laitah in dawkan tunga Jesu lim zua mikhat ka mu a, Tuajieh in Khristien sakho limte zong kana zua hi,” chi’n agen hi.

Kum tampi sung tam ka sumsuina hi ahing lien semsem a. Tun ka tapa in dawr a enkawl tahi, zillai leh tuosung mite dingin photocopy service zong ka pie hi. Rashid in a customer lah ah zaa 80 vel khu Catholic ahi thu agen hi.

“Ka dawr hi Siempute, Ngahnu Siengthoute, Brotherte, a chang chiengin Bishop te tan in ang ve let ahi,” achi hi. “Kamnem in ei houpi ua, amaute toh kimutuo kaki pah let mama hi.”

Rashid in Khristien sakhuo limte azua jieh in ama pawlpi Muslim te pan in doudalna leh gensietna katang ngaisih hi achi hi.

A dawr sungah, Khristien sakhuo limte hi slamic calligraphy, Makkah leh Madinah limte leh Qur’anic laisiengthou te toh akikoi khawm hi.

Catholic customer te dingin tami dawr hi devotional items lei theina mun lun pen ahi hi. Sumsuina bawlmi leh hun sawtpi tah customer hi Subir Gomes in sawtnailou in a sungkuonte dingin Last Supper leh Virgin Mary lim frame a siem a lei hi.

“Inn sungah sakhuo lam lim a um leh mite’n amai ah thu angen let uhi,” chi’n Gomes in agen hi. “Hun hamsa te ah tua thungetna in muonna ang tun hi.”

Rashid in Catholic Pawlpi mi leh khotang adinga anasepte apatat mama hi.

“Muslim mi himananleh, Khristiente dingin anasepna poimawh tah apie hi,” chi’n Gomes in agen hi. “A silbawlte tungah ka kipah pi mama hi.”

Bangladesh hi Muslim tamna gam ahi a, mi million 170 vel a um a, Catholic mi 450,000 vel ahi. Rashid in Tejgaon a Catholic khotang toh hun sawtpi akizawpnate pan a sakhuo khenlou a mihing khat hina a ki thutuo leh ki it dingdan ei hilchien hi.

Tejgaon Biehinn geia Catholic Pawlpite dingin Rashid dawr in sakhuo leh tawndan tuom tuomte toh khat leh khat ki itna leh kikhotuona toh hinkhuo man dingdan chien tah in ei ensah hil.