Bang dinga Venezuela kumpipa Maduro kimat tungtanga Venezuela siempupite (Bishops) ham ngam lou e?

Venezuela kumpipa, Pu Maduro kimatna ha khat achingta a, agam mi phasa khat in pha asa ua, hitamaleh kumpi neilou in aum veve uhi. Tambang dinmun a bang dinga agam siempupite hamlou phunloua um uh adiei? Tu dinmun a bangma gen lou ding hoi asa zaw uhi. Gen ding anei uhleh, ngaina in agen khawm jel uhi tualeh theisahna lai khat ahawm let uhi. Masang lai in mihing hina suhsietna (violation of human rights), dihtah a kitelna nei ding chite tungtangah thu ana jeh jel uhi. Caracas Khuopi a Archbishop Emeritus Pu Cardinal Bartazar Porras pen siempupi dangte sanga na hangsan khat ahia, ama pen in Venezuela kumpi ana ngiel let gige hi. Tuajieh in siempupi dangte’n ama aning koi let uhi. Kumpite’n zong ama aning khiin uhi. Kumlui December ha in kumpi’n Vatican Khuopi Visa anei vangin aphasahsih uhi. Cardinal Porras in mipi thu ana ngai let gige a, mipi dinmun ana pom let gige hi. Siempupi phasa khat pen in adap panpi veve uhi.

Hichi’n Venezuela gam a siempupite lah ah kikhenna neu khat um. Caracas, Venezuela Khuopi a Archbishop Biord in kumpi gamtatnate apom gige a, Pu Maduro tapa toh akipawl gige hi. Cardinal Porras leh Archbishop Biord kikal ah kilungnopna aum a, Archbishop Biord in Cardinal Porras kungah na umna inn nuasie in achia a pension zong apie nawnsih hi. Hichi’n akiinnlamtan tuoh gel hi. Ngaina in, Venezuela gam a pawlpi mite’n thu anei ua, mipi zalenna tungtang leh mihing lungtupna tangtun ding tungtang ah aw ana ha jel uhi. Adieh in munpi tote’n (parish priests) thu anei mama ua, kumpi hoi nading, zalenna hoitah a man nading leh mihing phattuom nading tungtangah thungetna nasa tah in anei zing uhi. Kumpi thong sunga umte ding inzong vai asai jel ua, thu anget pieh uhi. Hichi’n munpi tote’n agam u’ah nasa tah in pan ala uhi. Apeisa 2024 kum a President Pu Maduro in kitelna a lawchinna anei laitah in, gamsunga siempupite’n bang ahing gen ding uoi chi’n mipite’n angahla uhi. Hinanleh siempupite’n bangma thu athe ngap tuonsih ua, azong athe lou ua hoizaw in aum hi. Siempupite dinmun khat ah adingsih uhi china ahi. Ahi’n nikhat ni’n thu hing the va uh chi gintat um tualeh thu agen teitei uh zong ngai mama.