"Meihui Tongsan (digital) toh kithuo a mi thuzaw joute (influencers) in Pasian thu agen chiengun Khrist kawh uh heh" chi in Topa Felmar Fiel, SVD in First Asian Catholic Digital Missionary Assembly ah agen hi.
Filipino mite'n mun khat akaw u'leh anephu uh toh akawh ua, tu'n nephu tangin meihui tongsan toh Khrist mi kungah kawh vai achi hi.
"Ei meihui tongsan zanga Pasian thu gente'n mi ithuzaw thaw dinguh kisam mama" chi'n zong agen kia hi. Tam thu agenna hun ahileh vaidotna Mass Siengthou sung ahia, Quezon Khuopi a Radio Veritas Asia huong sunga Misiengthou Thum Biehinn a agen ahi.
Tam toukhawmna a thupi ahileh: "Mi thuzaw jouna (influencer) pat Mipi toh Zawlhawmna (Synodal) zuia Asia Gamkaipi a Pasian Nasemte (missionary) Hina" ahia, mi zakhat val tam toukhawmna ah ahing pang uhi.
Topa Fiel, RVA General Managerpa lamkaina toh Vaidotna Latna Siengthou (Welcome Mass) akimanga, ama gei ah Topa John Mi Shen, RVA Programme Director, Federation of Asian Bishops Conferences (FABC) a Office of Social Communications a Executive Secretary a pang, tualeh Topa Cyril Victor Joseph, Catholic Bishops Conferences of India (CBCI) a Executive Secretary apang gel hi.
"Bang achi khahleh na thu khan uh koi ahiei khat dingin Khrist toh kisuttuona ahing hithei ding hi" achi hi.
Simmun masa a Paul in Korinth pawlpite alaihahna masa ah tam imu uhi: Khristian masate'n hasatna tamtah ana tuoh uhi, agentena'n hinkhuo dihtah a man ding dan, mihing kithutuosahna, tawndan suhsiengna, biehna peipi ding dan, anneh tuidawn tan leh Pasian nasepna peipi ding dante toh ana kisikhop ua ana jou gige uhi.
Tambang hasatnate na tuoh nan u'leh, pawlpi masate ana tawntou veve jel ua, Khrist a akimelchina uh leh khat leh khat leh khat dinga hinkhawm ding ana mangngil vawtsih uhi. Amahaw zui lawm mama uh.
Tuhun laia inasepna u'ah tambang hinna zui ding kilawm mama. Ei meihui tongsan pansia a Pasian nasemte'n zong mihing ithuzaw dinguh akisam a, ki-itna leh Khristian hina ipulah dinguh ngai mama. Filipino mite'n mun khat akaw chieng ua anephu uh toh akaw mabangun nephu leh meihui tongsan gawm in Khrist kungah mi pui vai.
Topa Fiel in ang kikhawmte kungah thudohna khat aneia, tua thu ahileh meihui tongsan a na thu khante uh koi dinga na khan uh ahiei, ajieh pen mi tampi in angai dap a, asim dap a, azui zong atam mama hi.
"Eima leh eima maimai dinga ikhan uh ahileh, ahileh, mi thuzawna ahi maia, ahi'n ihinkhuo uh etlawm ahi a, itangthute un Jesu akawleh techi a pang isuoh uhi" achi hi.
Kipatna biehpiehna ah Asia Gamkaipi a hing kuonte'n anam puon chiet uh asil ua, kikhopna alawmsah mama hi.
Topa Mi Shen in mipi avaidotna ah nou digital missionary (meihui tongsan toh pang Pasian Nasemte) nahi uhi chi'n agen hi. Tualeh RVA huong ve dingin Pope Paul VI, Pope John Paul II leh Mother Teresa ahing kalsuon uhi achia, amahaw khom in mi thuzawna apie uhi achi hi. Amahaw pen ettah ahi uhi ajieh pen amahaw khom in Thuhoi Thupha ana phuong uhi chi'n zong agen hi.
Asian Catholic Digital Missionary Toukhawmna Masa pen akimang nalaia, September 13 tan akimang ding hi. Asia a Pawlpi in meihui tongsan toh panga Pasian nasepna apeitou jel nadinga a tami toukhawmna kimang ahi.
