Italy Gam a Presidency of the Council of Ministerste panlahna a thu tomkhat kahing lui thei kipah ing. Thului ahileh ‘Kham thei gui thei ve theina’ tungtang ahia, tulai in kham thei gui thei guoh toh khangthate buoi ahisih ua, tam sanga huoisiezaw ‘addiction’ (motlawna) tuomtuom ahing um nalaia, internet, mobile leh kikawmna tuomtuom toh khangnoute tamtah imansuota uhi. Tambanga kham thei gui theia kipiete in tahsa, hagau, lungsim buoina leh tahsa natna tamtah anei ua, hinkhuo amandan uh zong lamdang tah in akikhel hi.
Khangnoute hinkhuo enlei, lungsim buoina (mental disorder) jieh ma a kham thei gui thei a hing kipie ahi uhi chi ithei chiet uhi. Khuo leh tui in amahaw buoina iman jousih ua, imat jousihleh ipanpi jou tuonsih ding uhi. Joulei jousih lei kipan chiet vai in, lampi tha khat sui chiet vai. Internet leh vangetna toh sum baitah in asui ua, hinanleh lungkimna anei tuonsih uhi. Tua ban ah kham thei guithei baih tah a muna ahing kibelap nalaia, koima dal jou zong ahisih hi. Hichi dinmun a umte dingin hagau damna thu gen lei bangma’n asimsih uhi. Pasian thu leh hagau lam a alunglutsih u’leh, hagau nasemte dingin thasietna atung theia, hitama lezong na isep nalai dinguh kisam mama.
Nu leh pate, sanginn, collegete in panmun nasa tah a aIah uh ngai. Panmun alahsih u’leh khangnou tamtah imansuo ding uhi. Khangnoute sui bang e? Hinkhuo akhietna (meaning of life) bang e chi’n asui ua, amusih u’leh kham thei gui thei ma asui ua, hing pum in ahinkhuo uh amansuota uhi. Tana hing kikhawmte kung aka gen nuom thupi pen ahileh, khangnoute hinna tha pieh sawm vai, hinna a it thei nading u’leh khuo leh tui mi kahi, kei zong khuo leh tuia panmun luo kahi chi ahing mat thei nadingun panmun la chiet vai chi’n hing chiel ung. Atawpna ah atangthu uh (let’s spend time to listen to their story) ngai pieh vai in, amahaw dingin hun pie vai.
