Siempu sin tawpsan, kum 10 sangsie a na pangsa, tualeh USA a nasep muthei dinga a um pasal khat kum 20 jou in siempu sin dingin seminary ah alut kia a siempu suhdetna atangta hi.
John Shafaqat, kum 40 a upa, August 11, 2026 ni'n Pakistan gam a Lahore Khuopi a Sacred Heart Cathedral a Archbishop Khalid Rehmat in siempu suhdetna apieta hi. Latna Siengthou Masa (First Mass) ahileh ama khanletna parish, St. Joseph's Church, Lahore Cantt ah amang hi. Hichi'n kum 20 vingveng khuolzinna amuolsuota hi.
Topa John Shafaqat ahileh December 8, 1986 kum a Handoo Gujaran khuo a na pieng ahia, a innkuonpite pen Pasian phawh zing innkuon khat ahi ua, anu Nargas leh apa John Masih in Mari kungah ana ap gige ua, apa in kiphal tah in pawlpi na kum 50 sung ana sem hi.
Topa Joun Shafaqat pen unau nga lah a atum pen ahia, Lahore Khuopi a St. Mary's Minor Seminary ah 2006 kum in siempu sin dingin ana lut masa hi. Tuajou in St. Francis Xavier Seminary ah 2009 kum in alaisim ana zomtou kia a, 2012 kum in Karachi a Christ King Seminary ah Theology zil dingin alutta hi. Siempu sin hamsa sasengin 2014 kum in ahing pawtdohta hi. Katholik nautang mi khat (layman) in aum a, sanginn phasa khat ah la sie in apangta hi. Lahore a St.Anthony's High School ah zong ana panga, la pawl lamkai inzong ana pang jel hi.
Tam sanginn a ana pan laitah in Archbishop Sebastian Francis Shaw in seminary ah lut kia lachin hoiva chi in ana chiel hi. Nasep khat neia sum law ding, innsung etkol ding, zi nei ding, tuajou a USA a na sep ding, tualeh seminary a lut kia ding chitengin alung agimsah mama hi. Kum thum vingveng thu angen a, USA a zi ava nei ding anuasie a, 2024 kum in seminary ah alut kiata hi.
"Siempu suoh dinga ei kihan ahizaw hi" chi'n Fr. John in atosuo jou in agen hi. "Pasian kamsang Jonah ana pui mabangin Pasian in kei zong ei pui hi" achi hi.
Seminary ka lut kia masanga ka hun zahteng amawhna hisamsih chi'n agen hi. Hichia hum mankan sungin mi nautangte hamsatna kana muchien a amahaw panpi ding kana lunggul mawng ahi” chi’n agen hi.
Dahuoi tah in atosuo ni in anu leh apa aumsih uhi. A ordination masang kum nga masangin anu'n ashisanta a, apa'n kum thum masangin ana nuasieta hi.
A ordination ni'n "Ka nu leh ka pa thungetna ga kahia, ka siempu hinna amani ka ap hi" achi hi. Anu leh apa'n Jesu leh Nu Mari kunga ana puidan amangngil vawtish hi. Lahore Diocese a Vicar General a pang Topa Asif Sardar in hichi'n agen a: "Tutung tosuona hi kum tamtah khuolzinna muolsuo ni hi" achi hi.
"Kum 20 joua Shafaqat in tautung atawp ka mu chiengin ka luonlhi nawt chim sing" achi hi. Kum sawm sung layman (nautang mi) in ana um a, nisim hasatnate ana thuoh a, innsung mawpuohnate ana puo a, hitui luonna tamtah zong ana thuoh hi" achi hi.
Siempu suona atan jou in Lahore Diocese ah panmun khat aluo pai ngal a, Caritas Lahore ah zong toumun aluo a, thanuom tah leh kitahla tah in a siempu na asem panta hi.
