Odisha a Khristien pawlpite’n March 22 nitah a Diocese of Sambalpur neia om Titlagarh Parish a Holy Family Biehinn ki kibawlsietna tungah alungkimlouna uh a phong uhi.
Tami biehinn ahileh suhlam Bhubaneshwar pan a kilometre 390 a kigamla ahia, guta leh migilou pawlkhat in biehinn sunga van te agu ua tualeh khenkhat a susie uhi.
Catholic Diocese of Sambalpur te thusuo dungzui in guta te’n biehinn kawt asat sie ua, biehinn sunga lim siengthoute asat sie ua tualeh van siengthou te abawlsie ua donation box jong agu uhi.
Tami tungtang a Bishop Niranjan Sualsingh of Sambalpur in March 22 nia athu genna ah pawlpi mite kigom khawm a thungetna a pang in thudih thuman leh lemna atunna nadingin thu ngen chiet vai chi’n chielna anei hi.
“Tami tungthu jousie Pasian khut ah apvai,” chi’n lai agiel hi.
Parish priest, Divine Word Father Joseph Antony, associate priest Ashit Bilung, tualeh Holy Family Church pawlpi mite kunga jong ginna toh kigingkhol leh pilvang in omzing un chi’n hantawhna jong anein hi.
Tualeh Archdiocese of Cuttack-Bhubaneswar a Father leh human rights activist Ajaya Kumar Singh in tami thu ademna thu ana phuong hi.
Tami tungtang ah lamkai te leh vaisaite’n akithei banga pan la a thudih leh dan dungzui a tami biehinn bawlsie te tungthu kilel nadingin ngetna jong anei hi.
District administration te’n pan la a biehinn van te leh van siengthou te bit nading ahanchiem uh ngai ahi achi hi.
Tami thu ah First Information Report (FIR) lai akibawl ta a tualeh tu’n suichienna pei lel lel ahita hi.
Khristien pawlpi leh biehinn te leh sanginn te’n bawlsietna athuoh tawntung zing hi chi thuphuon apat in akithei hi.
Translated by: William Zo
