Apeisa September 17 ni’n Nigeria gam a St. Mary Amofia-Agu Affa Parish a parish priest Topa Okide a omna mun zuona ang kinuale na ah meltheilo migilo pawlkhat in ana man uhi. Tami tungtang ah Enugu Diocese a Chancellor, Topa Wilfred Chidi Agubuchie in September 19 ni’n thuphuonna anei a pawlpi mite kungah Topa Okide adingin thungetna neipie dingin Enugu diocese in ngetna leh chielna anei hi chi’n aphuong hi.
Topa Agubuchie in agen a, “Topa Okide adingin thungetna toh pang vai, Pasian in amante lung akikhelsah na dingin”, chi’n agen hi.
Thei dinga kilom in 2009 kum a Boko Haram helpawlte’n Nigeria gam aluo ua pat in Nigeria gam a Christian pawlpite’n bawlsietna atuoh zing uhi. Tualeh tami helpawlte tup leh dawi ahile Nigeria gam hi Islamic state suo ding ahi.
Africa gamkai ah Islamic pawl tuomtuom te’n zong mun dang azong Christian pawlpite abawl genthei mama uhi. Anukhia pen a thei dingin Topa Okide kimatna ahi.
Diocese of Minna in August 2 ni’n siempu khat leh siempu sin a om seminarian khat kimatna thu zong ana Phuong a tualeh August 23 ni’n Mali a Topa Paul Sanogo leh Tanzania gam a seminarian Melchior Mahinini te kal thum sung akimat zogel in ana kilha gel hi.
#rvazoservice #Nigeria #rvapastoralcare #Churchnews
