NICHIN THUMNA PUITU By Rev. Awnkhankhup
October 11 (Sepkiani)
AMA KI HUNKHE THEILOU
Tuachi mabang in siempulienten zong laigiel mite toh amau leh amau kihou in, a enghou ua, “Aman midang a hundoh a, Ama a kihunkhe theisih hi. I mu a, tualeh i gintat theina ding un, Khrist, Israel Leengpa tu in Kros a pat hing kumkhie heh” a chi uhi. Tualeh Kros a ama toh a kilbetkhawmte un zong ama a enghou uhi (Mak 15:31-32)
Mangpa Jesu’n khovel a nna a sep lai in, damlou natna zousie thuohte sudam in, dawite zong a nawtkhie hi. Tuabang in tawldam manlou in nna a sem hi. Hinanleh, Kros a khaikang ahi lai in ama leh ama a kisudam theisih hi. Kihundam nuom hitaleh, a kihundam thei thamtham ding a, poimaw hileh a vansawltahte zong gang tah in a hankhe thei tham ding hi. Hinanleh, nang leh kei damna ding in aman a thuoh a na ngai ahi zaw hi. Kilbeh a um hinkhuo in bawltheilou tampi a nei a ngai a, eima lam a manna ding tampi a huomkha hi.
