NICHIN THUMNA PUITU By Rev. Awnkhankhup
October 12 (Nilaini)
JOSEPH LEH NIKODEM
Tamte nua in Arimathai khomi, Judate a giin zieh a a guh a Jesu nuajui Joseph in Jesu luong a lah theina ding in Pilat kung ah a vangen hi. Pilat in phalna a pie a, tuachi’n ama a hing pei a Jesu luong a lata hi. Tualeh tumasang a zanlai a Jesu kung a hing hawpa Nikodem zong a hing pei a, murrah leh aloe kihal gimnamtui a gih dan pound zakhat vel a hing tawi hi (Joh. 19:38-39)
Joseph leh Nikodem-te khu Juda sahkhuo lamkai upate toukhawmna Sanhedrin member hi tuohtuoh dan un a kigen hi. Midangte mitmei a ven zieh ua, a guh a Jesu nuajuite a hi uhi. Joseph in Pilat kung a Jesu luong ngenkhie in puonnem in a tuom a, Nikodem in murrah leh aloe kihal gimnamtui Jesu luong tuomna puon kal ah a koi hi. Tuachi’n koima kivui ngai nailouna ah Jesu luong a sielta uhi. A hun lai a Jesu nuajuite khu migentheite ahi tangpi ua, a shina leh a kivuina hun ah Joseph leh Nikodem in a sil nei mantam tahtahte uh zang a Jesu luong a hing tuom uh khu a manpha in chiemte tham a ching hi.
