NICHIN THUMNA PUITU By Rev. Awnkhankhup
September 13 (Sepkiani)
KINGAINIEMNA-MITE DAMNA
Tualeh aman a kung uah “hing dom unlen tuipi ah hing pai un, tuachi’n nou a ding in tuipi a dai ding hi. Aziehpen keima zieh a tam khopihui nasatah i tung ua hing laang ahi chi ka thei hi” a chi hi (Jona 1:12)
Jona khu Ninevi khopi a kisiana thu gen ding a sawl ahilai in, a utlou zieh in Tarsis lam zuon tembaw khat ah a vatuong hi. Ama zieh a khopihui leh tui kihot thuoh ahi uh chi a kipuong a, ‘Keima zieh ahi’ a chi ngamna in a tuonpi midangte ading in damna a tun a, tualeh ama ngei zong a damkhie hi. Mihing lei leh kam in genkhieh ha a sahpenpen khu ‘Ka dihsih hi’ ahilouleh ‘Kei zieh ahi’ chi thutengte ahi ana kichi zel a, a dih mama hi. Midangte bawlkhiel bailamtah a i thei zel lai in, eima dihlounate khu kitheimawbawl a bailam mama zel hi. I dihlouna i genkhieh ngam chieng in midangte zong a na damkhe thei zel zaw uhi. Tuami mama khu ei a ding a zong damna ahi kia zel hi.
