NICHIN THUMNA PUITU By Rev. Awnkhankhup
September 21 (Nilaini)
MIDANGTE ZATAT SIEM
Mizousie zatat un. Na unaute uh it un. Pasian giing un. Leengpa zatat un (1 Pet.2:17)
Mihing ngaituona a pat et in, milien leh thuneitute zatat ding chi ahi lai in, i Pasian thu in ahileh mi zousie zatat ding in a hing thuhil hi. Tam khu Kristian hiloute toh i kibahlouna ding ua Pasian hing lam-etna zong ahi mawng hi. Gam leh nam lam a puitu lamkaite, khotang leh hattuom a houtute, ban ah mipi vantangte zousie zong Pasian thu bang zel a hina leh poimawna tuom chiet neite i hi ua, a kiliensah tuom ding koima umlou i hi uhi. Kitheisiemtuo chiet a, zong kizatattuo chiet dingte i hi uhi. Etsahna ding in Biehinn kemtu (chowkidar) in hattuom lamkai Pastor leh Upa-te mitmei veng siemtah leh zatat dan siemtah in a mawpuohna nna a semkhe ding a, tuama bang in hattuom lamkaiten zong, apoimaw bang zel a i sawlkawile ahina ah Biehinn kemtu zatat in i ngaisang ding uh ahi.
