NICHIN THUMNA PUITU By Rev. Awnkhankhup
October 20 (Ningani)
TUIPI SAN KAN
Tuachi’n Mosi in mipite kung ah, “Zausih unleh ding khinkhian un, Mangpa’n tuni a a hing etsah ding a hundamna khu en un: Tuni a na mu uh Izipt mite khu tangtawn in na mu kia nawnsih ding uhi”, a chi hi (Exo. 14:13)
Pharoah in Israel-te, nasem ding a phattuom tah a a zahsate hinapi uh khatvei thu a a pawtsah mai pen kisia tha ahiman in a sepaite toh sakollengte zang in ahing nuadelta uhi. Israel taten tambang a amau nuadeltute amu un a zau mamata uhi. Amau thahatna a nanzou guollou ding amau deltute leh amasang ua um tuipi san zauhuoi dan a kibang ahi mai hi. Pasian thupieh bang in a ding khinkhian ua, tuachi’n amau bawltheilou Pasian khut hat a pui a um in, tuipisan khu tuolgum a lamzawt bang in a kantanta uhi. Alelam ah amaute deltu Pharoah sepaite zousie tuipi san in a taimang nalai hi. I gingtu hagau hinkhuo ah Tuipisan kan a poimaw hun chieng in Mangpa hatna muong in hangsan tah in mailam naw zel va ui.
