NICHIN THUMNA PUITU By Rev. Awnkhankhup
October 21 (Ziltawpni)
KHAWLNI MANGPA
Tualeh Aman “Khawlni khu mihing a ding a bawl ahia, mihing khu khawlni a ding a bawl ahisih hi. Tuaziehin Mihing Tapa khu Khawlni Mangpa zong ahi”, a chi hi (Mk. 2:27-28)
Judate dan dungzui in Sabbath ni in mani innmun apat feet 3000 sang a gamla zaw a pawtkhieh phal ahisih hi. Jesu’n ‘Khawlni khu mihing a ding a bawl ahia, mihing leh a tahsapte khu a poimaw zaw’, chi in Sabbath ni in mi khutzaw a damsah hi (Mk. 3:1-6). Tam nasep in Pharisaite a lungkimsahsih mama hi. Jesu’n ahi kialeh, ‘Na lah ua koi ahiei khat in belam nei henlen, khawlni in kokhuh ah ketaleh koi ahiei a vakaidohlou ding? Belam khat sanga mihing khat bangchitah a manpha zaw ahiei? Tuaziehin khawlni a na hoi sep a sieng hi”, a chi hi (Mat. 12:11,12). Ganta hinna leh mihing hinna manphat dan a hing gente a, mihingte hinna manphat zawh dan gen in, Dan zui sang a hepina nasep manphat dan zong a sulang hi.
