MISIENGTHO AGNES PAWI
January 21
Misiengtho Agnes hi 291 kumin Rome Khuopi ah ana peing hi. Agnes kichi kammal pen Latin kam a Tuno chi na ahi. Tuaziehin misiengtho Agnes lim akisuoi chiengin ageiah tuno lim jong akisuoi teitei hi. Agnes pen christian numei melhoi mama ahijieh in guollhang tampi’n ana hel a, hima nanleh Agnes in aneulai akipat in a hinkhuo Pasian adinga siengtho tah a man ding leh pasal neilo dingin ki apna ananei hi.
Tuaziehin amatoh kiteng dinga thu gen tapo kungah akimu theilo vantung mopa kunga aki ap thu ana gen pie let hi. Alungsim kikhel lo ding ahi chi athei bep un khangnote’n Rome kumpipa kunga aheh ta uhi. Kum 12 achin in, 304 kumin thukhenpa maiah aki han a thukhenna ana thuoh hi.
Thukhenpa’n Agnes kungah a upna anuasie ding thu agenpieh vang in St. Agnes in ama upna a nuasie nuomsih ahi. Tuazo in thukhenpa’n agnes pen numei kizuate omna kholai ah a guohtanga kai dingin thukhenna anei ta hi. Pasal tampi’n Agnes bawlsiet ding ana sawm ua, hima nanleh ama bawlsie dinga hingpei tapo amitaw pai uhi. Tua hun laitah in St. Agnes in Pasian kungah thu angen a atahsa pumpi tungah sam ang poa atahsa asel hi.
Tuazo in aman kia ua ahing laia hal dingin akhi ua, hal ding akisah vang un asing akuong theisih ahi. Tami amu chiengin Rome galkapte lamkaipa alung athah mama a, anamsau ala a, St. Agnes angong tan tahi. Akitha masangin St. Agnes in ama that te kungah, “Na namsau tungah ka sisan bang nanleh Topa Jesu ka apsa ka tahsa tung na susie theisih ding uhi”, achi hi.
St. Agnes hi Rome khuopi a Via Nomentana kichi mun khat ah akivui hi. Catholic pawlpi in St. Agnes hi numei khangnote siengthona dinga ching leh kem misiengtho in akithei zing hi.
Misiengtho Agnes aw, kote adingin thu ei nget pie in.
