Protestant theologian khat in Catholic Pawlpi dihsih chia thu tamtah ana suoh vangin atawptawp na’h ama Katholik Pawlpi ah alutta hi ajieh pen Katholik Pawlpi hi Laisiengthou kipansia a naki phut ahi.
Katholik suoh Jimmy Akin tangthu tomlam in kan vai.
Apeisa 1965 a Corpus Christi, Texas a Jimmy na peing ahia pawlpi chientah khat ah minkhum ding zong ana donsesih hi. New Age kichi kipawlna khat ah pen ana lut a kum 20 achin in Khrist ah pienthana ana tang hi.
Laisiengthou leh theology lam ah lunglutna nasa tah in ahing neia, tuajou in Calvinism kichi pawlpite tahsanna toh kisai thulu nga ana pom a Presbyterian pawlpi ah ana lutta hi. Asil tup thupi pen khu Protestant pastor ahisihleh seminary professor hi ding ana sawm gige hi.
Hinanleh gintatlou tah in sil lamdang khat ahing pieng hi: Renee, Katholik numei khat zi in ahing nei hi.
Achiil in Jimmy in Katholik dou ding ana sawm hi. Katholik dihlou dan ana sin gige a, azi in Katholik pawlpi anuasiesah sawm hi. Azi ahilchien nading leh Presbyterian a alut sah thei nading in theology sim ana kipan hi.
Hinanleh Katholik pawlpi thuhil siengthoute ahing thei siem deudeu a, Laisiengthou ahing theichien deudeu jou in Protestant ahina atha in ahing ngaituo hi.
Alungsim kingaituo thana Laisiengthou simmun khenkhatte:
MATTHEW 16:18–19 — Tualeh keiman nang kahing hilh hi. Nang Peter na hi, tualeh tami suongpi tungah ka pawlpi ka lam dinga mishi khuo kul kotkhaahte’n tami ajousih ding hi. 19 Ken nang vangam kotkil kahing pie dinga, leitunga na kaan jousie van a zong kaan ahi a, tualeh leitunga na suut jousie van a kisuutsa ahi.”
JOHN 20:21–23 — Khumin Jesun akunguah, “Hamuonna na kung u’ah umta hen. Pa in kei ahing sawl mabangin, ken zong noute kahing sawl hi,” achi hi. Tuachia khum thute agen jou in, atung u’ah ahuu ahakhum a, akung u’ah, “Hagau Siengthou ngata un. Koipou mawna na maisah u’leh, maisah ahita a, tualeh koipou mawna na maisah loute uh pen maisahlou ahi.
1 PETER 3:21 — Tuami toh kibangin kibaptisna in Jesu Khrist thawkiana jieh in ahing hunkhieta hi, chi tunga chiniehte silsieng bang ahisih a, hinanleh sie-le-pha theina siengthou nei nadinga Pasian kunga agenna ahizaw hi.
MATTHEW 18:18 — Chitahtah in kahing hil ahi: leitunga na kaan pouma uh van a zong kaan ahijouta a, leitunga na suut pouma uh van a zong suut ahita hi.
Dawn hamsa mama thudohna khat zong amai ah asung hi: LAISIENGTHOU SUNGA LAIBU UMTE KOI IN ATEEL KHIET E?
Laisiengthou beh (Sola Scriptura) kichi Protestant pawlpite pom thupi pen ahing ngiel panta a, Kristian pawlpite’n Laisiengthou bang chibanga ahing nei uh adiei chi ahing ngaituo tha hi.
Katholik pawlpi kihilnate amawh paimang thei nawnsih hi.
Tuathamlou in Protestant theology hoitah in angaituo kia hi. Azi Mass Siengthou ah azawpi jel a tualeh Katholik pawlpi sunga kitenna Siengthou nga ding ahing nuom ta hi.
December 1, 1991 in Katholik siempu khat in ana letthat gel hi.
1992 kum in Jimmy Katholik pawlpi ah ana lutta hi.
Sil kikheldan alamdan dan!
Azi Katholik pawlpi apan a apotkhiet pi thei nading in Katholik pawlpi thuhilte asim hi. Hitamaleh a suichienna jou in azi pawlpi ah alut a, azi in anuasiesah sawm pawlpi mi khat ahing suohta hi.
Akikhelna tangthu hi guoljawna leh dana khat ahi, Azi Renee zong colon cancer natna nei in nasatah in ahing dammaw hi.
Jimmy khu Katholic pawlpi hung khat ahi suohta a tu’n Catholic Answers kipawlna laibu giel in akitahla mama hi. Hichi’n Katholik pawlpi hing (apologist) hat mama khat ahi suohta hi. Apologist poimaw mama khat ahing hi a, Catholic Answers ah Senior Apologist panmun aluo a tualeh Katholik sakhuo tungtang thu hilna laibute agiel hi.
Tuni’n ama tangthu hi kihilna hoitah khat ahing hita hi. Pilna lam a gin umna leh lungsim siengthou toh thutah suina in mikhat Katholik pawlpi ah atut hi.
JIMMY KIKHELNA PAT A ZILDOH DING:
Katholik pawlpi tungtang suichien ding zau sin.
Pawlpi miluite tungtang thu sim ding zau sin.
Katholik sakhuo hing kipat dan zungthu suichien ding zau sin.
Tualeh athupi pen ah, Na tahsanna luite toh kibang sih tama lehzong thudih zui ding zau sin.
Katholik nahi nadinga Laisiengthou na paimang ding ahisih hi. Khatveiteng, Ginna meivaah toh Laisiengthou nahing theisiem tahtah jieh a Katholik suoh nahi.
Thudih in suichienna aging sih hi. Tualeh thudih in ei jawpina pouma zuitaah ahi.
KATHOLIK PAWLPI SUNGAH HING VAIDOT UNG!
