Fatima a i Tounu Mary (Our Lady of Fatima) kichi pen tamveipi naza tading ua, Fatima khuo a May lha 13 apat 13 October 1917 kuma Tonu Mary naupang thum kunga ana kilahna tangthu ahi. Lou hou innkuon a hing kipan naupang thum, Lucy, Francis leh Jacinta kungah Nu Mary ana kilang a. Tana naupangte ave laitah in nualam a phuon doh ding thusim phasa khat ana pie hi. Tua thusimte khu nualam in Fatima thusim thum (The Three Secrets of Fatima) akichi hi. Tua Thusimte ahileh thu lamdang mama ahing suoh uhi, ajiehpen nualam in tua thusim te ahing tangtung hi.
I Tounu Mary Thusim masapen ahileh tua naupang thumte’n meikuongpi ana mu chienna uh ahia, Thusim nina ahileh leitung galpi masa ahing vengdoh dinga tuajou in nei-leh-lam kitanna (Communism) kichi ahing khang ding hi. Tualeh communism zong ahing veng dinga Katholik pawlpi ahing tungtuong kia ding hi. Agentena’n Russia ah communism avengta a Katholik pawlpi aki pawm kia tahi. Chiemtena lamdang khat van ah ahing kilang ding hi chi’n zong i Tounu Mary’n aphuonga, tua dungzui’n 25 January 1938 in van ah meivah kileh chi tuomtuom akimu hi.
Thusim a thumna ahileh lungbuoina khom thu khat ahi ahi’n June 26 kum 2000 in aki Phuong doh tahi. Pawlpi lamkaigte ngaidan ahileh thusim a 3na in Pope John Paul a nina kikap nading tungtang amagen hi chi’n gintat om achi uhi. Kimkhat in ama kikapna toh kisai koisih achi uhi.
Tounu Mary kilah kiana leh sil lamdang nukhiapen ahing pien khu lamdang akisa hi ajiehpen tua sil lamdang pen mit a akimu ban ah thusuo lai tamtah ah zong aki Phuong hi. Tua sil lamdang na pieng pen ni lamdanna (Miracle of the sun) akichi hi. Tampen mi 30,000 in ana mu ua, alah ua thusuo saite leh man zaite zong a om uhi.
Ni lamdanna mute’n van ah ni ahing lam valong a, achi akhel a leng keng bangin akipei hi achi uhi, ahi’n a ente mit pen asoh vot sih hi. Mit a mu ngailou tami sil lamdang pen tai 40 a gamlate’n zong kamu uhi achi uhi. Kum ni zoin mi million ni vel tami mun ah Tounu Mary kunga thungen dingin ahing zin ua, gam uhte’n amah vang un biehinn khat alam uhi. Tounu namu naupang thum lah ah sister Lucy asot hin pen ahia, 1919 kumin Fracesco asita a, 1920 kumin Jacinta zong asita hi. Nualam in Lucy ngahnu siengthou ahing suoh a, koima kimupi senglou in convent ah a om khinkhian a Tounu Mary amu zong koima kungah ahil sih hi. Ahi’n 1930 leh 1940 kikal in alunga akuo teng leh alung zuonpi teng lai ah ahing giel doh a ahom panta hi. Akunga akilah lain Tonu Mary in mawna pana kisiana leh mawna zieh a tahsa dehna thu aha genpen hi.
Sister Lucy lai gielte pan in thungetna tamtah aki phuo hi, agente na’n tua Fatima thungetna kichi khigui khin chienga zahuoi Mary dawng sawm nget jou chiengin tami thungetna akin gen hi: “Topa Jesu aw ka mawnate uh hing ngaidam inlen na hepina dei leh ngai mamate ha van ah puilut tan”.
Tounu Mary tungtang theibe ding ngai mama, tualeh ama zatatna ipieh semsem nading un khigui khin hakat vai tualeh Nu Mary toh kisai laibu lei vai’n sim let vai. Tualeh ama kungah thungetna tuomtuom te zong ngen vai’n Tounu Mary milim tuomtuom te zong aw vai. Tuaban ah Tounu Mary toh kisai limpia te zong en let vai.
#rvazoservice #rvapastoralcare #OurLadyOfFatima
