“TOHDING HELOU, NEILOU HO CHU
MITHASE HO AHIUVE”
By - Dr. Sir. H.Hemkholun Mate
Mihem koi hileh tohding kahepoi, toh ding kaneipoi tiho chu toh ding hollou, gellou, tha seng nom lou, lunggel
nomlou ahiuve, hitobang miho chu mithase ho ahiuve.
Vannoija mi hung incheng ho, na hintong jing ho, tohdoh hin neiho, mi hetdoh a hung um thei ho khu mipon tho, natoh pontho
ho, lunggel hat ho, thale jung seng jing ho ahiuvin ahi. Eimite
atamjo hin genthei jong ithoh nompouvin, natoh jong ikijapi uvin, na tonglouva vah nilhum mi jong aum in, hitobang mi ho chu ivetna ahileh a inchenna lam mah mi dang natong pontho
ho, natoh kijapilou ho, lunggel hatna, natoh pontho ho inchen
apha joupon ahi.
Tunin eimite society sung a tohding kahe poi, toh ding kaneipoi ti jing ho thu a phat chom khat kihou lim hiute.
Mipontho te dingin tohding tamtah anei uvin, toh ding ahe
jing uvin, toh ding anei jing uvin, akiseimo jing thei uve. Hinlah mithase ho khun toh ding kahepoi, toh ding kaneipoi atiuva
hinkho aman jeh uva vaicha, genthei jui ahiuve. Mihem in kum
60 ihi masanga hi toh thei chan toh ding, pontho tah a pan lah
ding, igol toh ahilouleh igol sanga ichungnunna ding’a na hatoh
a toh jing ding ahi. Na kitong le kitonglou akibangpon ahi.
Atong ten atohga /man amu/aneh tei tei ahi. Atonglou hon vang
amu/ane pouve.
Eimite hi kin le dong neilouva mohva va mi aum in ahi. Hoija che ding nahim tia avah le ho khu idoh le amaho a
konna donbutna kimu/kija thucheng chu “amoh va va kahi”
kiti thu cheng ho hi ahijui in ahi. Midangte, mipontho te, natong hatle, phat homthote chun ahileh hilaijah or khulaijah tohding, chena ding kin kaneije tia eidonbut thei u ahi.
Eimite a vang chu midangte thusei tobang hilou ahi. Hichun avetsah chu mithase, lunggel nomlou, tha le jung sen nomlouva natoh kathaset jeh a moh va le le kahi itinao ahi. Hiti ho jeh a hi eimite atamjo ivaichat u, igenthei u ahibouvin ahi.
Gamdang’a iche a mi ho hindan ale natoh dan ivetna ahileh eiho a toh van le leija kikhe/kigamlat tobang bep
ahibouvin ahi. Midang ten phat mantam dan ahe uvin, phat che
dungjui jin sum ahol uvin, phat che dungjui in na atong uvin
ahi. Eimite vang chu sun nilhum ma ima cha toh doh neilouva
jong hinkho iman theiju ahi. Hichu imit monao le ithasetnao
kiphuon dohna ahi. Igam sung uvah toh ding atam in, hinlah
eimiten toh ding kahepoi, toh ding kaneipoi iti nalai uve.
Adeh a lekha kathem e, BA or M.A. kahi tia sun nilhum a Juar Kap,
Ludo loh, flash kap chuleh hotel dunglah a tou nilhum lhumma
houlim ho khu ivetna ahileh hetna lhasam, chihna lhasam chuleh thilboltheina neilou mi ahivue. Atohding hedoh thei, toh
ding nei jing thei, na tong jing thei mi ho khun phat ahom tho
tei tei ju ahi. Phat manthem hi lolhinna ahi. Chuleh leiset chunga aphat cha alhunna ding lhung theilou, achena dinga chetheilou, atohna dinga tong theilou ho alolhing ngaipon ahi.
Miding’a napha, thilpha ibolla, na itohpih a, ipanpi
leh eima le eima kipanpi aki hi bouvin ahi. Thilpha kibol jouse
nikho khat le aphat chuomna kimu kit tei ahi. Thilse ibol jong
leh ithilse bolga nikho khat le kinetei ahi. Tonglou, thamlou,
gellouva atongte, athamte, agel te neitobang, neh tobang neh ding kiti chu ahithei lou ding tina ahi bouve. Migucha ho khu mithase ho ahiuvin ahi. Atha, ajung asen nom lou jeh uva
midang thil aguh u ahi. Bible a Migucha guchata hih hen, akhut
tah in napha tong gim hen, ati hi mi jousen geldoh jing a ikhut-tah a napha toh ding ahibouve. Natoh ding nahetlouva, tohding
kaneipoi nati thei ja ahileh nang jong mithase, gol phalel ding mi nahin, phate cha naki ngaito ding, toh ding na kihet ding, toh ding nanei jing ding angai in ahi.
Keima hetdolle mudolla hi lekhathem hon thon-
louvin natoh ding he uvin tin, toh ding nei jing uvinte kati ahin,
hinlah eimite lah a lekha them kahi, graduate kahi, Post graduate kahi, doctorate degree holder kahi ti hon toh ding kahepoi,
toh ding kaneipoi atiu hi kakhuolla ahileh mithase ngen ana
hiuvin ahi. Lhoh manchah je helou, athepna ho amanna ding dolla mangcha theilou, natoh ding dan hethei lou mi atamjo hi
eimi society sunga um ahi. Bible sim sanga lekha dang thuduh,
thudah lou kisutna ho simnom jong umkit ahiuve.Hitobang
mite ihi jeh uva midangte iphah joulou u ahibouve, Sopite.
Thaset hi diabol(setan) a ahin, pottho hi Pathenna ahi.
Kiseimona ding natoh hethei lou, neithei lou ho chu miching
ahipouvin ahi. Kum 60 nahi masangin leisetna hin na inchendohna ding in natong in, pontho in, gunchu in, thoh hat in,
lungneng in, chuti le bou na lolhin thei ding ahi. Mithase hon
chonset abol doh nom in, mipontho hon chonset bolna ding
phat amu joupon ahi. Eimite phate cha ikikhuol diu, lolhinna
dinga na itoh diu ahi. Hichu eiho dinga hinlo, penlo ahibouvin ahi.
