Nipi Zaw Ni Li Ni Siengtho (Holy Thursday)
Nitah annluina nukhia (The last supper)
Nipi zaw Ni Li Ni Siengtho (Holy Thursday) ni in Jesu Khrist in anuazuite toh ann luina nukhia alopna uh akiphawh a, azong pawlpi in alawm hi. Tam ni in Jesu in Siengtho Pumpi Sacrament ana phut a, akimat leh singlamte a akikhailia masanga a ana bawl hi. Tam ni inzong Jesu in Siempu Suona Sacrament (Institution of the Priesthood) ana phut hi. Tami ni hi Nipi Kal Siengtho sunga tu ahia, Thawkia Pawi masanga kilawm ahi.
Jesu in anuazuite toh Peisan Pawi (Passover Feast) tami ni in ana lawm hi. Hichi’n, Peisan Pawi chienga kelnguoi khat akitha mabangin, Jesu in tua kelgnuoi dinmun aluo a, hichi’n tami pawi toh leitung mite suotatna apieta hi. Tam josie Jerusalem Khuopi a napieng gige ahi.
Tami annluina aman laitah un Jesu in ama leheh dingpa aphuong hi. Tami pawi ilop chiengun Jesu in annluina nukhia ana lopna iphawh ua, tam hi Mass Siengtho ah iphawh uhi. Tuami nitah ma in Jesu in Siempu Suona Sacrament ana phut a, ke’n tambanga ka bawl mabangin noho’n zong hichi’n na bawl un chi’n nuazuite tha ana pie ana ap hi. Tuami nitah inzong Jesu in anuazuite keng ana sawppieh hi. Ama khu siempu masa ahi tualeh nuazuite zong siempu asuohsah hi.
Tuni’n munpi tuomtuom ah siempute’n Topa Jesu bawl mabangin, munpi mite lah a pasal 12 keng asawp hi. Tam pen Jesu in nuazuite keng ana sawppieh iphawna uh ahi.
Jesu leh nuazuite’n annluina nukhia aman laitah un, Jesu in tangho aphalsuo a, anuazuite apie hi. “Tami la unlen ne un, tami keima tahsa ahi” chi’n nuazuite apie hi. Tuajo in lenggazu hai khat adom kia a, anuazuite apieh pum in hichi’n agen kia hi: “Tami na unpi un la unlen dawn un, tami ka shisan ahi.” Akoimapo, tami tahsa ne leh shisan dawnte’n kumtawn hinna anei ding uhi chi khu eite tahsanna lienpi khat ahi. Mass siengtho ah tami ilawm gige ua, eite kumtawn hinna ahing suoh hi.
#rvazoservice #rvapastoralcare #Holyweek #MaundyThursday
