Mihing khat hoina leh hoilou na tung ah, Inkuon (Family) sunga Nu leh Pa khut ah akinga hi.
Mihing khat hoina leh hoilou na tung ah, Inkuon (Family) sunga Nu leh Pa khut ah akinga hi.
- Nu leh Pa ten mawpuona lian pen tate tung ah anei hi.
Sangkaina (School) ahi leh Naupangte ding in inn nina(Second Home) akichi a, aziehpen Kihilna leh pilna, siemna ajilna mun uh jong ahi. Ahivang in, Nu le Pa mapuina leh thuhilna khel a thupi ding aum sih hi. Naupang te lawchinna ding in Nu le Pa panmun hi apoimo mama a, a homework bolte uh a enkai zing ding ua, umdan tanchin leh mi jatat dan hiltu khu Nu leh Pa ahi.
- Nu leh Pa ahileh Naupang te lawmhoipen zong ahi.
Nu leh pa’n tate aduat mama angai a, ahun neisun uh tate ading in azang ding ua, a lawm leh guol te uh jong atheipi gige uh angai hi. Nu leh Pa’n tate tawh lung siengthou tah a kihou dan thei angai a, naupang te ngaituona te thei apoimaw a, a nichin poimaw te uh theipi zing angai hi.
- Nu le Pa te ahi leh tate lawchinna leh lawsamna kingahna ahi uhi.
Nu leh Pa ten tate lai simna ah atosawt zing uh angai a, anichin hinkhuo mandan uh a enkai zing ding uhi. A loi pawl te uh enkai leh khual angai a, bang tobang loi ahi uh theipi gige zing angai hi.
Lawchinna leh Lawsamna ahile, Mihing khat hinna ah akitua zing a, Nu leh Pa’n tate tunga ahing tung chiengin alahdan siem angai hi.
Naupang pawl khat laisimna lam a siemsih nan uleh zong, Sildang, bawlthei dang anei tei uhi. Nu leh Pa ten, tate laisiamlou a siamna dang neite I kipapi ding ua, I tosot uh angai hi.
Naupang te lungkiet na ding thu genlou ahoi a, jahsah jong ahoi sih hi. Aziehpen naupang te lungneu nalai uh ahi chieng un lungkietna ang nei kha ding uhi. Naupang ten Lawsapna sang tah anei chieng un Nu le Pa kithuopina sangpen angaina uhi.
Nu le Pa te ahi leh naupang ten adamsung ua bang e abol ut uh leh ahi ut uh, suikhiet na dinga chabi poimaw tah ahi uhi. Tammi theisiam na ding in nu le pa ten naupang te siamna te leh bawltheina te akhual khiat uh apomaw hi.
Akigensa mabang in, naupang te lunggel pia hun jong thei angai a , alunggel uh kup hun jong thei angai kia leu leu hi.
- Nu le Pa te ahi le naupang te dia Zatou hoipen pen ahi.
Nu le Pa ten tate damtheina etkol jing angai a, a dammaw na neu neu te zong theisiam apoimaw hi. Natna hiih langte lah apat vengbit angai a, natna apat vengbit nading in siengthouna ngaikhoh apoimaw hi. Naupang te suhsieng zing le siengthou dan ngaipoimo sah zing angai hi.
Nu le Pa te ahileh, Pasien sil siemte lah a ahoipen ahia, Naupang te dia silpiah hoitah ahi.
