Vatican khuopi panlahna tungtawn in ukraine leh Russia kikal ah lemna ahing um kha diei?
Vatican Khuopi in Ukraine leh Russia kikal ah lemna um thei va chi’n kinepna aphuong hi. May ha nimit 16 ni’n Istanbul ah kikupna ana um a, hinanleh bangma kinepna thu leh kilemna thu aum jousih a, tuajieh in Ukraine kumpipa, Pu Zelinski in Pu Pope Leo tungah kinepna lienpi anei gige hi. Ama kinepna ahileh, USA leh Europe Gamkaipi a lamkaite leh Pu Pope Leo toh kihoulima umleh, kilemna zong hing um khava chi’n akinem mama hi.
Pu Zelenky ngaidan ahileh, tami kikupna Turkey Gam ma ah kineileh hoiva achia, tam mun alemsihleh Switzerland hileh hoiva chi’n ngaidan asung gige hi. Ahi’n Turkey ahisihleh Switzerland innteh in apang nuom ding uoi mah, koima gen thei hinaisih. USA President, Pu Trump inzong Ukraine leh Russia kilem nading ana ngaituo veve a, apeisa May 19 ni’n Putin toh dahkal ni sung kaki kum geel hi achi hi.
Pu Trump in Pu Zelinsky, (Ukraine kumpipa), Pu Immanuel Macrom (France kumpipa), Friedrich Merz (Germany kumpipa) leh Ursula Von der Leyen (Europe Gamkaipite Kipawlna lutangnu) akihoupi a, tam gam ni kikal a kilemna tungtangah akikuppi hi. Pu Pope Leo inzong tam gam ni a kilemna aum thei nadingin pan ala gige a, “Kilem nading vai kipandoh vai” achi hi. Pu Trump in Italy kumpinu, Pi Giorgia Meloni zong ahoupi a, nang innteh in na pang thei diei chi’n akikuppi hi.
