"Rome in Tuolsung Pawlpi a khel sih hi," chi’n Synod Official in FABC palaite kungah gen

Synod on Synodality kizuihna pen Rome apat local Church-te thu kizawpna leh thu piahna ahi ; tua sangin, khovel pum huop a Pawlpi toh kizopna nei kawm in, Tuolsung Pawlpite'n Hagau Siengthou in amau' dinmun leh khualzinna ah bangcih in a kaihuai uh cih amau' ngei in theihchet ding leh thutanna nei ding ahi, Vatican Synod Office a pang Fr. Giacomo Costa, SJ in Federation of Asian Bishops' Conferences (FABC) Plenary Assembly vai-12na a palai te kunga  agen hi.

Fr. Giacomo Costa, SJ pen General Secretariat of the Synod ah consultor khat leh Synod khawvel pumpi a kizuihna nasepna ah mi pawimawh khat ahi. Aman "Pathways for the Implementation of the Synod" chi thupi nei in, Jakarta khua, Hotel Mulia a Vanda Room ah July 24 ni in thugenna nei hi.

Asia gam dangdang apat Bishop leh Pawlpi makaite kunga agenna ah, Synod kizuinna thu pen Vatican apat thu piahna tamzaw ding lam hilou in, Tuolsung Pawlpite'n Hagau Siengthou in amau' kimkot, ngeina leh nasepna sung ah bangchi in a kaihuai uh chi theihchiet ding leh zui ding ahi thu agen hi.

Aman, "Rome in Tuolsung Pawlpite mawpuahnaa a lah sah sih a. Rome in amau' a thakhel sah lou" achi hi.

General Secretariat of the Synod in Tuolsung Pawlpite a zui, a pan pieh leh a kisam sil te a pe ding ngen ahi, dioceses-te'n Synod lampi a kizuihna uh a zop theihna dingin.

Fr. Costa in a thugenna pen Pope Leo XIV in College of Cardinals kunga a thugenna tungtawn ah a bulphuh hi. Aman tua thugenna pen Synod kizuihna hun theihna ding tawh kizop pawimawh pen ahi chi hi.

Pope in Pawlpi vaiguon tha khat kipan ding thu gen louin, Bishop-te kunga ah Synod kizuihna pen "lungmuang tah leh kipumpiak tah in" amau' Pawlpite sung ah zui dingin a ngen hi. Tua bangin Pasian mite pen "Gospel tawh kituah zaw semsem pawl dangte" nei dingin kaihuai ding ahi.

Fr. Costa in tua pen ngaihsutna tha khat ahi chi hi.

Aman, "Synod kizuihna hun pen Vatican pan thu piah te bang administrative regulation ahi bangin zui mai ding hilou hi. Tuolsung Pawlpi khat khat in Hagau Siengthou in amau' mite amau' tangthu, ngeina leh pastoral dinmun sung ah bangchi in a kaihuai cji thei chetna ding ahi," chi hi.

General Secretariat pan document tuamtuamte—Synod Final Document, implementation pathways leh practical guidelines—pen Church nasepna laigil hi ding hilou hi, chi in a gen hi.

Aman, "Laigil tah tah pen Pawlpi nunna leh mission ahi," chi hi.

Tua document-te pen tuolsung kipawlnate panpi na ding leh lampi hilhna ding ahi a, amau' theihchetna a lah sah ding hilou hi. Tuolsung dinmun tawh kitua in kizang ding ahi a, bangbang in zui mai ding hilou hi.

A tawpna ah Fr. Costa in, Synod in a bawl lawmtah pen Tuolsung Pawlpi pen Gospel kihilna, upna nuntah na leh missionary disciples kisin na mun bulpi ahi chi muan na tha a piangsa hi, chi in agen hi.

Aman Bishop-te kunga ah, Synod kizuihna hun pen kithuahkhawmna (communion), kipanlahna (participation), leh mission a thuzawhna ding hun ahi chin, Tuolsung Pawlpi khat khat in Hagau Siengthou kipawl na nuai ah amau' dinmun tawh kituah in sem ding leh khovel pum huop Pawlpi tawh pumkhatna nei zing dingin hanthawnna pia hi.

Tua kawmkal in, ama'n Tuolsung Pawlpi thupi sahna in amah leh amah khenkhia a, thu nei tuan ding ahihlou thu a hilchien hi.

"Pawlpi pen Pawlpi tampite kipawlkhawmna ahi," a chi a, Pawlpi khat chiat pen midang Pawlpi tawh a thu zilkhawmna, kihoulimna leh kitheihpihna tungtawn in a khangtou thei hi achi hi.

Tua bang ngaihdan mah in, Synod in diocese te, bishops' conferences te, continental assemblies te leh Pawlpi khawvel pumpi tawh kizopna leh kithuahna peih den ding a hanthawn hi.

Fr. Costa in tua kizopna pen enkawlna leh kithuahpihna (accompaniment) ahi a, enkolna leh thupie sah na (supervision) hilou hi achi hi. General Secretariat in Pawlpi tawh thakhat in ngaihtuahkhawm ding,Hagau Siengthou in a septe kipah pi ding leh nah in a ding pastoral mission te thu kikhenkhawm dingin pan a la hi.

Ama thugen in Synodal Church sung ah bishopte mawpuahna lam tha zong a suh lang hi. Bishopte pen thupieh te sem tawmmai ding hilou in, pumkhatna siam ding, mi jousie teltheihna hawng ding leh Pasian mite'n Hagau Siengthou nasepna theihchiet khawmna mun siam dingin a hatana ahi hi.

FABC Plenary Assembly ah tel bishop tampite pen Asia gam dangdang ah Catholic mi tawmnou Pawlpi te enkawl mite ahi jie un, tua thupuoh in a thupi mama hi.

Fr. Costa in Asia gamte pawl dang te leh sakhua chi tamna ziakin Pawlpi jousie ading pastoral model khatbeh om theilou hi ach hi. Tua sang in, Pawlpi khat chiat in ama dinmun dungzui in synodality bangin a bulphuh theih ding sui khiet  ding ahi a, tua kawmkal mah in Pawlpi khawvel pumpi tawh pumkhatna kemching ding ahi hi.

Ama thugen in FABC Assembly thupi ngaihsutna khat zong a lang sah hi: Synod mailam ding pen phungtha siamna leh document tamsem bawlna tungah kinga lou ding a, pawlpi khat chiat in ama mission ngam tah a puo ding, thakhat in theihchetna bawl ding leh Pawlpi khawvel pumpi tawh pumkhatna sungah Lungdamthu nuazui dingte tungah kinga ding ahi.