Philippines gam a kumpi thudih maw jieh in siempupite'n mipite kungah kiphin un chi'n gen uh

Philippines Gam a Cardinal Pablo Virgilio David in agam ua Katholik Pawlpi mite kungah kumpi gitnat lou jieh kiphinna ah pang un chi'n hanthawnna apie hi. Mitmu ngei in kumpi adusahsih ua, juouthu toh vaihawm tamtah aum a, mipite'n kumpi tahsanlana anei uhi. Tutung kiphinna pen apeisa September 21 nia kibawl kizom kia ahi. Tam ni'n Trilion Peso March kichi na kineia, mi asangsangin kiphinna bawl in ahing kuon uhi.

Mipite lungkum louna ahileh, kumpi sum leh pai kizah dan adihsih hi, sum chientah in zang un chi'n mipite'n kumpite kungah agen uhi.

November ha, 16 ni'n Iglesia ni Cristo kichi tam gam a pawlpite khat in kiphinna ah apang uhi. Mi lakh sawnga vel ahan ua kiphinna ah alamkai uhi. Tami pawlpi hi Philippines Gam pawlpi hat mama khat ahi ua, azong atam mama ua, a aw uh kumpite'n azasah nuom uhi. Tam kiphinna ah Katholik Pawlpite zong achiel ua, hing pang un, kumpite gitnat lou kawh vai achi uhi.

Tuikhanglet dal nadinga sum leh pai kumpi in apiehte, azangte'n dihtah in azangsih ua, tuajieh a mipite kiphin ahi uhi.

Philippines Gam a Katholik Pawlpite se 85% apha ua, adang se 15te bieh pawlpi dangdang ahi ua, tua lah ah Iglesia ni Cristo Pawlpite atam pen asuoh uhi. Apeisa 1986 kum President Marcos in agam ataisanta a, mipite'n adeilou jieh adelgamta uhi. Ama hi tangkhat uhpa (dictator) ahi, ama uhna sungah agam uh matawn sangin anuatawnsah zaw a, mipite'n adelgamta uhi. Katholik gam hitama lezong, Philippines Gam ah kumpi hoi ana um ngaisih a, agam uh abuoi zing hi. Tuatham lou in agam u'ah muol pawh (volcano), tuisanglet leh guo engzuhna aum zinga, khaichi tawi jieh zong aum theisih hi. Agam ua kilemna ahing um thei nadingin thu nget pieh va ui.