Pakistan Bishop in Biehinn sung siengthouna venna dingin kitenna pawi a lim kikapte dingin dann siem
Archdiocese of Lahore, Pakistan a Archbishop Benny Mario Travis in Kitenna Pawi biehinn huong sunga kiman chienga lim kikapte adingin biehinn leh Kitenna Siengthouna venna dingin dann khautah asiem hi.
Tami hi tulai khang a lim kikap chienga umdante biehinn leh sacrament siengthou toh kilawm lou a umjieh ahi. March 10,2026 nia a lai giel na ah Pu Archbishop in siempute, Pasian nasemte tualeh archdiocese sunga pawlpi mite kungah Biehinn siengthouna zatat dingin agen hi.
“Cathedral leh Lahore a biehinn dang dang te ah Kitenna siengthou kinei masang leh akijo chiengin innkuon kuon a lim kila in ibuoi thei mama uhi, Kitenna siengthouna ilawp pum un, Pasian inn siengthou zatat dinga eite hat ihi uhi. Biehinn hi ithungetna mun uh ahia, tam munah Pasian ibie ua, thu ingem ua, Pasian toh ikimu uhi,” chi’n agen hi.
Dann siemte ahileh:
- Kitenna pawi a lim lah hi Mass siengthou subuoi lou a, Parish priest phalna toh kap thei ahi pan ding hi.
- Mounu leh Moupa toh lim kila dingte tualeh a innsungmite’n Kitenna Siengthou akinei jou Chieng in Parish priest mapuina toh akila thei pan ding uhi.
- Group photo Cathedral ahilou leh Biehinn lutna ah lah thei ahi ding hi.
- Studio lah banga ikhut ikeng idei bang a bawl ding Biehinn sung leh akiimvel ah phal ahisih hi.
Archbishop in tami dann siemte kitenni a mipi kunga gen ding leh theisah dingin siempute leh Pasian nasemte kungah ngetna anei hi, Mounu leh moupa tualeh a innsung mite’n dann kisiemte atheisiem ua mun siengthou zatat ahi nadingin.
St. Ignatius Church Lahore Parish priest Fr. Adnan Rasheed in tam dann siemte hoi asa mama hi.
RVA toh akihouna ah hichi’n agen hi: “Lim kilate leh a innsungmite’n Mass siengthou laitah tualeh thunget laitah in ang kila zel ua, tami’n akiteng tegel leh siempupa asubuoi mama hi. Tualeh lim siengthoute mai a kilawm lout ah a ikhut ikeng koidan te un biehinn sung leh a pawi siengthouna amangsah hi.
Fr. Qaisar Feroz OFM Cap, executive secretary of the Episcopal Commission of Social Communications in agen a, “Biehinn hi studio leh hall ahisih a, lim kilate’n tami mun siengthou azatat ding uh apoimaw hi. Tualeh mi tampi’n theina sasa in azatat sih u alim kikapna mun bangin abawl uhi.”
Fr. Feroz, Pakistan a Radio Veritas Asia Urdu Service a luboh pa’n zong athugenna ah kitenna pawi hi hun manpha tah ahia thunget pum a man ding ahi lim kakap toh buoi sang in achi hi.
Archdiocese of Lahore hi Pakistan sunga dingin Catholic diocese lah a lienpen ahia, parish, sang-inn, tualeh vaiguol tuomtuom te tungtawn in khopi sung leh akiimvel ah pan nasa tah nei ahia tami dan siemte tungtawn a tuolsung maimai asuhkha hilou in Asia gamkai a katholik pawlpi mite zong asukha hi.
Translated by: William Zo
