BBC Thusuo ah Pope Francis in “Kinepna toh Thunget zinna neivaI” chi’n leitung pumpia pawlpite ahanthawn hi. “Kinepna leh mi lungsietna toh zin lei Thuhoi Thupha zuite isuoh ding uhi” chi’n zong agen kia hi.
Tam thu pen Vatican Khuopi a Kotpi kihon masanga agen ahia, Kumtha 2025 hongta ngal ihijieh un, khat leh ki lungsiet lei, tam Jubilee Kum hi kum siengthou ahing suoh ding hi achi hi. Itheisa mabangun Pu Pope Francis in December 24, 2024 ni’n Kot Honna aneia, Jubilee Kum akipan ahita hi chi etsahna in kot ahong hi. Kingiemkhietna kum inzong mang vai chi’n kot ahon jou in pawlpite ahanthawn hi.
“Gal, khuo leh tui in thudih avena leh dipkuot huoi sil piengte in ilung kiesahsih vai, tualeh tam kinepna pen tahsanna leh ki-itna toh zong zom vai” chi’n zong agen kia hi. Pope Francis in athugenna ah, mihing kipumkhatna leh Pasian kunga lungdam thuh zing ding aha gen ahi.
Pope Francis in kot ahon jou in tam kot thunget zinna neite’n akan gige ua, bang etsahna ahei ichi u’leh, tam kot ka kan lang kalsie, piengtha va ing, kinepna toh khuol zin nalai va ing china ahi. Lungdam Pawi Thupha (Christmas Message) agenna ah Pope Francis in “Pasian lung kot hi akihong zing ahi, ama lang kinga vai tualeh tambanga ei it leh ei ngaidam lungtang tungah kingam zing vai achi hi.
Jubilee Kum kichi pen Jiu mite’n ana zui zing uh tawndan khat ahia, kum 50 sungah khatvei teitei Jubilee Kum aphuong ua, tam kum in kipahna pawi amang ua, tuaban ah leiba jousie akimaisah a, suoh leh salte akiha a, zalenna aki pie uhi. A inn alou uh kilahpiehte akipie gige hi. Hichi’n Jiu mite’n kipah thanuom tah in Jubilee Kum ana nit gige uhi. Pawlpi inzong tulai in kum 25 sungah Jubilee Kum kichi aphuong gige a, kipahna kum in akimanga, tuathamlou in, kisiemtha nading vai tamtah akihawm hi. Tutung in Pope Francis in “Kinepna toh zin vai” (Pilgrims of Hope) chi’n pawlpite ahanthawn gige hi.
Pawlpi ngaina in Jubilee Kum akiphuon chieng, pawlpi mite Rome Khuopi ah thungen dingin azin ua, tu-le-tu inzong pawlpi mi tamtah Rome ah thungen dingin azin uhi. Pawlpi mi jousie Rome a zin joulou ahijieh un, agam agam ah biehinn bangza ahiei khat akitel a, tuanah pawlpi mite thungen dingin akuon uhi. Archdiocese of Imphal a dingin, St.Joseph’s Cathedral akitel a, Lamka lam dingin Good Shepherd Parish akitel hi. Tam lam a um pawlpi mite tukum in khatvei teitei tanah thungen dingin kuon uh hen chia ei kihanthawn ahi. Hichia thungen ding a kuonte dingin leitung dantana akimaisah hi, chi pen, mawna jieh a dantana itan dingte phasa khat pawlpi in Jesu Khrist min in angaidam hi. Tam khu Mangkam in “Plenary Indulgence” akichia, pawlpi in Jesu piehsa tha aneina toh mawna jieh a leitung dantana phasa khat amaisah ahi.
Tutung Jubilee Kum sungin mi ni misiengthou akisuohsah dinga, amasa pen ahileh Hampha Carlo Acutis ahia, ama hi Teenager Saint (kum 20 nei leh kum 13 tung) misiengthou asuoh dinga, asuo ni ding ahileh 27 April ahi ding hi. Anina ahileh Hampha Pier Giorgio Frassati ahia, ama pen khangdawng misiengthou akichi hi. Misiengthou asuo ni ding ahileh 3 August ahi ding hi.
