Pu Pope Francis in ei nuasie jieh in. leitungin kelnguoi ching siem khat amansuota a, dahuoi kisa chiet. Ama hinkhuo a imu siem pen uh ahileh mi khuotuona, kingiemkhietna leh leitung mihing itna ahi. Apeisa 2013 kum a akitel pan in ama'n leitung ah mihing khuotuona tha khat ahing tut a, Katholik Pawlpi in leitung mihing jousie khentuom neilou a a-it dan alah jel hi.
Pope dinmun atuh sungin leitunga thudih thuman tuna ding ana hanchiem gige a, adieh in mizawngkhalte ana khuotuo dieh hi. Tuatham lou in leitung kepching ding dan zong vai ana hawm a, tam toh kisai in 'Laudato Si' (Topa na min kiphat hen) kichi laibu khat ahing puodoh hi. Tami laibu ah phamsa Pu Pope Francis in, ileitung uhi i-inn chiet ahi, kemching vai chi'n ana giel hi. Ama damsungin Katholik in leitung mihing pumpi ahuom a, koima akituom koisih hi chi'n azinna chin ah ana gen gige hi. Khristien Tahsanna kichi khu bangma pi ahisih a, khat leh ki-itna, khat leh khat kikhuotuohna leh Pasian kunga ikinepnate mansuolou khu Khristien Hinna ahi chi'n mipi mai ah tamveipi ana phuong hi.
Khuomutna a meivah: Tahsanna leh Kipahna: Pope asuoh jou lien Pu Pope Francis 'Lumen Fidei' (Tahsanna Vah) kichi lai khat ana zom pai ngal a, tam lai ahieleh phamsa Pu Pope XVI ana giel ahia, ajoumansih a, Pu Pope Francis in ana jou hi. Tami lai a thu kigiel ahileh, Tahsanna kichi khu lampi vahsah china ahia, pawlpi sungah itna neilei ilampi uh avah ahi mai hi. Next Para: Tami lai pawlpi mite kunga ahawm jou in, lai tha khat ahah kia a , tam lai pen Evangelii Gaudium (Kipahna Thuhoi Thupha) akichia, tami lai ah Pope Francis in Pasian itna kintah leh kipah tah in hawm vai chi'n pawlpi mite ahanthawn hi. Ama'n pawlpi khu galphuol a zatou kitung toh ate hi. Galphuol khat poupou ah zatou aum teitei a, aliemte akizen pai hi. Pawlpi zong galphuol zatou in ngaituo vai in, damna hawm vai in, khat leh khat tunga thu khenda vai chi'n tami lai ah agiel hi.
Khuotuona alaikim ah koi vai: Khuotuona (hepina) khu Pope Francis sou (Iheart beat) ahi. Misericorddiae Vultus (Khuotuona Maitang) kichi 2015 kum a alaihahna kia khat ah Pope Francis in hichi'n agen hi: "Kikhuotuona hi Thuhoi Thupha sou ahi chi'n agen hi. Tami kum ma in Kikhuotuona Jubilee Kum aphuong, tam kum sunga tup leh dawi ahileh pawlpi in ei it hi, ei ngaidam hi tualeh ei vaidot hi chi'n pawlpi mi jousie in thei heh chi'n tami ana the hi. Tam kum jou, 2016 kum in lai khat ahawm kia a, tami lai min ahileh Misericordia et Misera ( Hepina leh Genthei Thuohna) akichia, tami lai ah Jesu in angkawm numeinu ana khuotuona thu agen a, Jesu in tamnu ana khuotuo mabangin ei pawlpi mite inzong mi gentheite khuotuo vai in, amahaw siemmaw tangsahsih vai chi'n mipite ahanthawn hi.
Leitung leh mizawngte aw zahpiehna: Laudato Si (Topa na min kiphat hen) kichi laibu minthang mama khat Pope Francis in 2015 kum ahing puodoh a, tami laibu ah ileitunguh ei leitung mite'n ikepsih u'leh koi kep ding e, tualeh leitung tambang a bua ei leitung mite'n iphiet ngilsih u'leh koi kep ding e tualeh mizawngkhalte ikhuotuosih u'leh koi khuotuo ding e chi'n tami laibu ah chientah nou in agiel hi. St.Francis in ganhingte leh tungleng vate ana it ana ngai mama a ana houpi jel a, eite etlawm pen ahi chi'n ana giel hi.
Adamlai lai in Pu Pope Francis in itna leh khuotuona thu ana mawh gensih a, nasep in anei gige hi. Tamveipi galtai, vaitai leh neh leh tah kisamte kungah ava haw let a, ana hamuon hi. Aw neiloute aw in ana panga, leitung kana awging inzong ana panga a, kelnguoi ching, akelnuoite toh kipawl zing lamkai khat in ana um gige a, mi'n zong amu ua, lamdang asa uhi.
Ama isuun sungun, a hagau dingin thu nget pieh vai in,hagau lamkai hoi khat ahinate mangngilsih va ui. A aw pen iza nawnsih ding ua, hinanleh gou ei nuasie piehte pom den vai in, leitungah kilemna bawlte hivai, thudih thuman suite hi va ui. A it mama a Pa kung zuon ahita a, leitung khuovah in apang nalaia, kinepna ei pie nalaia, khangtawn in athuhilte leh etlawm ei piehte zom zingta hen!
